جمعے اور ہفتے کو بازار کھولنے کی اجازت، 8 مئی کی رات 12 بجے سے سندھ میں مکمل لاک ڈاؤن

 

کراچی: صوبائی وزیراطلاعات کا بیان ,سندھ حکومت نے جمعے اور ہفتے کو کاروباری مراکز اور بازار کھولنے کی اجازت دیتے ہوئے  8 مئی کی رات 12 بجے سے صوبے بھر میں مکمل لاک ڈاؤن کے نفاذ کا اعلان کردیا۔

سندھ حکومت کی جانب سے جاری ہونے والے اعلامیے کے مطابق صوبے بھر میں ہفتےکو عیدشاپنگ کیلئےکاروباری مراکز کھلے رہیں گے، ہفتے اور اتوار کی درمیانی شب سے مکمل ڈاؤن شروع ہوگا۔

سندھ حکومت کے مطابق ہفتے اور اتوار کی رات سے لوگوں کو گھروں تک محدود رکھنے کے لیے جگہ جگہ ناکے لگائے جائیں گے۔ حکومت کے مطابق سندھ میں آنے والی ٹرینوں کو بھی15 مئی تک بند رکھاجائے گا، وزیراعلیٰ سندھ اس معاملے پر وفاقی وزیراسد عمربات کریں گے۔

لاک ڈاؤن کے دوران اشیائے خوردونوش، میڈیکل اسٹورز ، فروٹ اور سبزی کی دکانیں مقررہ اوقات تک کھولنے کی اجازت ہوگی۔ سندھ حکومت کی جانب سے جاری اعلامیے میں کہا گیا ہے کہ کل سے اتوار تک ریسٹورنٹس کو مغرب تک ٹیک اوے کی اجازت ہوگی جبکہ مغرب کے بعد صرف ہوم ڈلیوری کی جائے گی۔

اعلامیے میں بتایا گیا ہے کہ گروسری شاپ شام 6 بجے تک کھلی رہیں گی، عید کے دنوں میں ہاکس بے، سی ویو  کو مکمل بند رکھا جائے گا، میڈیکل اسٹورز کو  کو بندش سے استثنیٰ ہوگا جبکہ  ویکسینیشن سینٹر 24 گھنٹے کام کریں گے۔ اعلامیے میں بتایا گیا ہے کہ اتوار سے عید کی چھٹیوں تک مزید سختیاں کی جائیں گی اور ایس او پیز پر ہر صورت عمل کرایا جائے گا

صوبائی وزیراطلاعات ناصر حسین شاہ نے اجلاس کے بعد میڈیا سے گفتگو کرتے ہوئے کہا کہ ’کراچی سمیت سندھ بھر میں جمعہ اور ہفتے کو کاروبار کھلا رہےگا، دکاندار ایس او پیز کے ساتھ لین دین کرسکتے ہیں، اتوار سےکاروبار کی بندش اور مکمل لاک ڈاؤن کا نوٹی فیکشن بھی جاری کیا جائے گا‘۔

واضح رہے کہ سندھ حکومت نے کرونا کی صورت حال کے پیش نظر کاروباری و تجارتی مراکز کو ہفتے میں دو یعنی جمعے اور اتوار کے روز بند رکھنے جبکہ صبح 6 سے شام 6 بجے تک بازار و کاروباری مراکز کھلونے کی اجازت دی ہے۔

کرونا روک تھام کے لیے سندھ حکومت نے بین الصوبائی ٹرانسپورٹ اور سندھ کے ایک شہر سے دوسرے شہر جانے والی گاڑیوں کی آمد و رفت بھی مکمل بند کردی ہے۔

عید الفطر کی آمد کے پیشِ نظر این سی او سی نے بھی ملک بھر کے تمام سیاحتی مقامات کو بند رکھنے کا اعلان کیا جبکہ تمام ہی صوبوں نے مکمل لاک ڈاؤن کے نفاذ کا اعلان کیا ہے۔

Leave a Reply

Your email address will not be published.