طالبہ کے ریپ اور قتل نے شملہ کی پہاڑیوں کو ہلادیا‘ ملزم ہلاک

نئی دہلی جدت ویب ڈیسک: بھارتی شہر شملہ میں چند روز قبل ایک طالبہ کی اجتماعی جنسی زیادتی اور اس کے قتل کا نامزد ملزم پولیس کی حراست میں ہلاک ہو گیا ہے۔ اِس لڑکی کے ریپ اور بہیمانہ قتل پر ہمالیہ خطے میں شدید غم و غصہ پایا جاتا ہے۔اس جرم نے شملہ کے پہاڑی شہر کی آبادی کو ہلا کر رکھ دیا ہے،شملہ میں ہزاروں افراد نے اس مقدمے پر پولیس کے برتاؤ کے حوالے سے مظاہرہ کیا۔ یہ مظاہرین حکومت سے انصاف کا مطالبہ کر رہے تھے۔ اس واقعے کے بعد سے شملہ کے بعض علاقوں میں کاروبار معطّل ہے۔میڈیارپورٹس کے مطابق اس کیس میں کشیدگی اْس وقت بڑھ گئی جب اس سنگین جرم کے ایک ملزم کو اْس کے سیل میں ایک دوسرے قیدی نے ہاتھا پائی کے دوران قتل کر دیا۔ ہماچل پردیش پولیس کے انسپکٹر جنرل ظہور ایس زیدی نے بتایا کہ نیپال سے تعلق رکھنے والے ایک قیدی سورج سنگھ نے لڑائی کے دوران ملزم کا سر دیوار سے ٹکرا دیا۔ زیدی کے مطابق ملزم کو ہسپتال لے جایا گیا جہاں ڈاکٹروں نے اْس کی موت کی تصدیق کر دی۔سولہ سالہ طالبہ کی جنسی زیادتی اور قتل کے مبینہ ملزم کی موت کی خبر سنتے ہی شملہ میں ہنگامے شروع ہو گئے جن میں غصے سے بھر پور مظاہرین کی جانب سے پولیس اسٹیشن اور گاڑیوں پر پتھراؤ کیا۔ اس واقعے کی سفّاکی نے ہماچل پردیش کے رہائشیوں کو ہلا کر رکھ دیا ہے۔ یاد رہے کہ ہمالیہ کی اس ریاست میں جنسی جرائم کی شرح تمام بھارت کے مقابلے میں سب سے کم ہے۔ قتل ہونے والی طالبہ کی پوسٹ مارٹم رپورٹ میں تصدیق کی گئی ہے کہ ریپ کرنے کے بعد گلا گھونٹ کر اسے ہلاک کیا گیا جبکہ اْسکی ایک ٹانگ بھی ٹوٹی ہوئی تھی۔

Leave a Reply

Your email address will not be published.