کراچی: جدت ویب ڈیسک :جنوبی افریقا کی کرکٹ ٹیم کا تھنک ٹینک بھارت میں رہ گیا، ویزا مسائل کی وجہ سے پروٹیز اپنے دیرینہ اینالسٹ کو پاکستان ساتھ نہ لے جاسکے، پراسنا اگورم بنگلور میں گھر سے ہی لیپ ٹاپ کر ٹیم کی رہنمائی کریں گے۔ تفصیلات کے مطابق جنوبی افریقی کرکٹ ٹیم26 جنوری کو کراچی میں پاکستان کے خلاف پہلا ٹیسٹ شروع کرے گی،اسے بھارت سے تعلق رکھنے والے اپنے اہم ترین ممبر اور تھنک ٹینک پراسنا اگورم کی خدمات میسر نہیں ہوں گی،وہ گذشتہ 11 برس سے بطور پرفارمنس اینالسٹ ساتھ کام کررہے ہیں، پراسنا ویزا مسائل کی وجہ سے پروٹیز کے ہمراہ پاکستان نہیں جا سکے۔ وہ اب بنگلور میں اپنے گھر سے ہی لیپ ٹاپ پرٹیم کی رہنمائی کریں گے۔ بھارتی پاسپورٹ کی وجہ سے جنوبی افریقی ٹیم مینجمنٹ نے انھیں بتایا کہ کوشش کے باوجود سیکیورٹی پروٹوکول کی وجہ سے پاکستان کا سفر نہیں کرسکتے۔ اس لیے اب ٹیم جرسی میں ملبوس اور آفیشل ٹریننگ جوتے پہنے اپنے گھر پر 2 لیپ ٹاپ کے ساتھ موجود ہوں گے، شہر میں لوڈشیڈنگ کے خطرے کی وجہ سے وہ ایک گھنٹہ بیک اپ فراہم کرنے والے یوپی ایس کا بھی انتظام کرچکے ہیں، پراسنا نے کہا کہ میں گھر سے ہی اپنی ٹیم کی مدد کیلیے پوری کوشش کروں گا مگر ڈریسنگ روم میں بیٹھ کر کام کرنے کی اپنی الگ اہمیت ہوتی ہے، تب میں مختلف وقفوں کے دوران صورتحال کے حوالے سے کوچز کو جائزہ رپورٹس پیش کرتا اور وہ اسی کے مطابق حکمت عملی بناتے ہیں۔

لاہور:جدت ویب ڈیسک : علیم ڈارکے دل کی مراد پوری ہونے کا وقت قریب آ گیا، وہ جنوبی افریقہ سے سیریز میں احسن رضا کے ساتھ پہلی بار ہوم گراونڈ پر ٹیسٹ میں امپائرنگ کریں گے۔ پاکستان اور جنوبی افریقہ کے مابین سیریز کیلیے میچ آفیشلز کا اعلان کردیا گیا، علیم ڈار اور احسن رضا پہلی بارہوم گراونڈ پر کسی ٹیسٹ میں امپائرنگ کے فرائض انجام دیں گے، میچ ریفری جاوید ملک طویل فارمیٹ میں ڈیبیو کریں گے، ان کے ساتھ دونوں ٹیسٹ میں آصف یعقوب تھرڈ، راشد ریاض فورتھ امپائر ہوں گے۔ پہلے ٹی ٹوئنٹی میں علیم ڈار اور احسن رضا آن فیلڈ، شوزب رضا ٹی وی اور آصف یعقوب فورتھ امپائر ہیں، دوسرے میچ کیلیے شوزب رضا اور آصف یعقوب آن فیلڈ، احسن رضااور راشد ریاض تھرڈ اور فورتھ امپائر ز مقرر کیے گئے ہیں، آخری ٹی ٹوئنٹی کیلیے علیم ڈار اور راشد ریاض آن فیلڈ، احسن رضا اور شوزب رضا تھرڈ اور فورتھ امپائرہوں گے، میچ ریفری جاوید ملک ہی ہوں گے۔

لاہور / کراچی: جدت ویب ڈیسک : محمد حفیظ کی جنوبی افریقہ کیخلاف سیریز میں شرکت پر سوالیہ نشان لگ گیا،پی سی بی نے ٹی ٹین لیگ سے دستبرداری کا پیغام دیا، آل راونڈر نے انکار کردیا، ان کا کہنا ہے کہ 3فروری کو بائیوببل کا حصہ نہیں بن سکتا، 7کو جوائن کروں گا، اگر نہ کھلانے کا بہانہ ڈھونڈ رہے ہیں تو الگ بات ہے۔ تفصیلات کے مطابق قذافی اسٹیڈیم لاہور میں شیڈول3ٹی ٹوئنٹی میچز کیلیے منتخب کرکٹرز کو 3 فروری تک بائبوببل میں رپورٹ کرنا ہے، محمد حفیظ اس دوران ٹی ٹین لیگ میں مصروف ہوں گے جو 28جنوری سے 6 فروری تک ابوظبی میں شیڈول ہے۔ذرائع کے مطابق پی سی بی کی جانب سے کھلاڑیوں کو پیغام دیا گیا ہے کہ پروٹیز سے ٹی ٹوئنٹی سیریز کھیلنے کیلیے ٹی ٹین لیگ سے دستبردار ہونا ہوگا، مگر محمد حفیظ معاہدے کو ختم نہیں کرنا چاہتے،آل راونڈر کا موقف ہے کہ ابوظبی میں ایونٹ مکمل ہونے کے بعد 7فروری کو ہی اسکواڈ کو جوائن کرسکتا ہوں۔

لاہور: جدت ویب ڈیسک :جنوبی افریقہ کے خلاف سیریز کے لیے قومی ٹیم کے ارکان کل کراچی میں رپورٹ کریں گے۔جنوبی افریقہ کے خلاف سیریز کے لیے قومی ٹیم کے ارکان کل کراچی میں رپورٹ کریں گے۔ اعلان کردہ بیس کرکٹرز کا ایک کوویڈ ٹیسٹ ہفتے کو ہوا تھا، جس کی رپورٹس میں تمام کھلاڑی اور مینجمنٹ کے ارکان کلیرہیں اب دوسری کوویڈ ٹیسٹنگ کراچی میں ہوٹل پہنچنے پرہوگی۔ کپتان بابراعظم، عابد علی، اظہرعلی، ہیڈکوچ مصباح الحق، بولنگ کوچ وقار یونس، مینجر منصور رانا سمیت دوسرے ارکان کی منگل کہ سہ پہرلاہورسے فلائٹ ہے۔دوسرے شہروں سے تعلق رکھنے والے کرکٹرزبراہ راست کراچی پہنچیں گے، قومی ٹیم میں پہلی بار منتخب ہونے والے ڈومیسٹک کے پرفارمرزپاکستان کپ کے سلسلے میں پہلے سے ہی کراچی میں موجود ہیں۔ پانچ روز کے قرنطینہ میں رہنے والی قومی ٹیم کے ارکان کودوسری کوویڈ ٹیسٹنگ رپورٹ نیگیٹوآنے پر اکیس جنوری سے نیشنل اسٹیڈیم میں ٹریننگ کی اجازت ہوگی۔

کراچی: جدت ویب ڈیسک :قومی ٹیم کے فاسٹ بولر محمد عامر نے قومی کرکٹ ٹیم میں واپسی کے لیے مشروط رضامندی ظاہر کردی۔ گزشتہ دو دنوں سے سوشل میڈیا پر یہ خبریں گردش کررہی ہیں کہ فاسٹ بولر محمد عامر پاکستان کرکٹ ٹیم کے لیے کھیلنے پر رضامند ہوگئے ہیں تاہم آج محمد عامر نے سماجی رابطے کی ویب سائٹ پر بیان دے کر اس بات کی وضاحت کردی۔ فاسٹ بولر محمد عامر نے اپنی ٹوئٹ میں لکھا کہ میں واضح کردوں کہ میں پاکستان کے لیے دستیاب ہوں گا صرف اس وقت جب یہ مینجمنٹ چھوڑ کر چلی جائے گی لہذا صرف اپنی اسٹوری بیچنے کے لیے مجھ سے متعلق جعلی خبریں نہ پھیلائیں۔ خیال رہے دورہ نیوزی لینڈ کے لیے 35 رکنی اسکواڈ میں منتخب نہ ہونے پر فاسٹ بولر محمد عامر نے لنکن پریمیئر لیگ سے واپسی پر اچانک قومی کرکٹ ٹیم سے ریٹائرمنٹ کا اعلان کرکے سب کو حیران کردیا تھا۔ریٹائرمنٹ سے متعلق اپنے بیان میں محمد عامر نے قومی کرکٹ ٹیم کی موجودہ مینجمنٹ خاص طور پر ہیڈ کوچ مصباح الحق اور بولنگ کوچ وقار یونس پر متعدد الزامات عائد کیے اور ان کی مینجنٹ میں کھیلنے سے انکار کردیا جس کے بعد پی سی بی کے چیف ایکزیکٹو وسیم خان نے بھی محمد عامر سے رابطہ کیا اور انہوں نے اس بات کی تصدیق کی کہ وہ پاکستان کے لیے مزید کھیلنے کیلیے تیار نہیں ہیں۔

کراچی: جدت ویب ڈیسک :جنوبی افریقی کرکٹ ٹیم 14 سال کے طویل وقفے کے بعد باہمی سیریز کھیلنے پاکستان پہنچ گئی ہے۔ جنوبی افریقا کا 38 رکنی اسکواڈ خصوصی پرواز کے ذریعے کراچی پہنچا ہے۔ پروٹیز کی قیادت وکٹ کیپر بیٹسمین کوانٹن ڈی کوک کررہے ہیں۔ جنوبی افریقا کی کرکٹ ٹیم پاکستان کے خلاف 2 ٹیسٹ اور 3 ٹی ٹوئنٹی انٹرنیشنل میچز کھیلے گی، دونوں ٹیموں کے درمیان پہلا ٹیسٹ 26 جنوری کو کراچی میں کھیلا جائے گا جب کہ دوسرا ٹیسٹ راولپنڈی میں 4 فروری سے شروع ہوگا۔ سیریز میں شامل دونوں ٹیسٹ میچز آئی سی سی ورلڈ ٹیسٹ چیمپیئن شپ کا حصہ ہوں گے۔ سیریز کے تینوں ٹی ٹونٹی انٹرنیشنل میچز قذافی اسٹیڈیم لاہور میں کھیلے جائیں گے۔ یہ میچز 11، 13 اور 14 فروری کو ہوں گے۔ پروٹیز کھلاڑی اپنی قرنطینہ کی مدت کراچی میں مکمل کریں گے، جس کے بعد انہیں ٹریننگ سیشنز اور انٹرا اسکواڈ پریکٹس میچوں میں شرکت کی اجازت ہوگی۔ دورہ پاکستان کے دوران جنوبی افریقا کی ٹیم کو سرکاری مہمان کے مساوی سیکیورٹی فراہم کی جائے گی۔ واضح رہے کہ جنوبی افریقا کی کرکٹ ٹیم 14 سال بعد پاکستان کا دورہ کررہی ہے، آخری مرتبہ جنوبی افریقا 2007 میں پاکستان آئی تھی تاہم دونوں ملکوں کے درمیان باہمی ہوتی رہی ہیں اور پاکستان نے جنوبی افریقا کی میزبانی متحدہ عرب امارات میں کی ہے۔ 1995 کے بعد سے لے کر اب تک دونوں ٹیموں کے درمیان کل 11 ٹیسٹ سیریز کھیلی جا چکی ہیں۔ ان 11 میں سے 7 میں جنوبی افریقا جبکہ ایک میں پاکستان نے کامیابی حاصل کی ہے۔

لاہور : جنوبی افریقہ کے خلاف ٹیسٹ سیریز کیلئے 20 رکنی قومی کرکٹ اسکواڈ کا اعلان کردیا گیا، بابر اعظم کپتان جبکہ محمد رضوان نائب کپتان ہوں گے۔
شان مسعود، محمد عباس اور ظفر گوہر کو قومی ٹیم سے ڈراپ کردیا گیا۔ سعود شکیل، تابش خان اور نعمان علی ٹیم کا حصہ بن گئے، حسن علی کی ڈیڑھ سال بعد ٹیم میں واپسی ہوئی ہے

لاہور:جدت ویب ڈیسک : شاہد آفریدی نے کہا ہے کہ محمد عامر اور کوچز تنازع پرانی روایت ہے، میرے وقار یونس کے ساتھ اختلافات کسی سے ڈھکے چھپے نہیں، یہ کوئی اچھی روایت نہیں ہے۔ لاہور میں کشمیر کرکٹ لیگ کے آفیشل ترانہ کی لانچنگ تقریب میں میڈیا سے بات کرتے ہوئے سابق کپتان نے کہا کہ محمد عامر ہو یا کوئی بھی کھلاڑی پی سی بی کو اسے مستقبل سے آگاہ کرنا چاہیے، تاکہ وہ ذہنی طور پر تیار ہوں کہ اگر میں نے پرفارم نہیں کیا تو باہر ہو جائوں گا، بورڈ پیسر کو بلا کر بات کرکے معاملہ ختم کرے۔ نیوزی لینڈ میں شکستوں کے سوال پر انہوں نے مسکراتے ہوئے کہا کہ شکر ہے، اس بار انہوں نے کورونا پر ڈالا عام طور پر تو فٹنس پر ڈالتے ہیں۔ مصباح الحق کے بارے میں اسکول سطح کا بھی کوچ نہ ہونے کا بیان دییے جانے پر شاہد آفریدی نے کہا کہ سابق کپتان کی پاکستان کیلئے بڑی خدمات ہیں لیکن ٹیم میں تھوڑی دلیری ہونا چاہیے، مرغی کا دل لیکر انٹرنیشنل کرکٹ نہیں کھیلی جاسکتی۔