January 21, 2020

قومی کرکٹر بلال آصف جلد اپنا پہلا گانا ریلیز کریں گے ،ویڈیو دیکھیے

جدت ویب ڈیسک ::قومی کرکٹر بلال آصف جلد اپنا پہلا گانا ریلیز کریں گے جس کی خاص بات یہ ہےکہ یہ گانا انہوں نے خود ہی تحریر کیا ہے۔
بلال آصف نے ٹوئٹر پر اپنے آنے والے گانے کا پوسٹر مداحوں سے شیئر کیا اور ساتھ ہی اپنے پہلے گانے کے حوالے سے کیپشن میں خیالات کا اظہار بھی کیا۔
قومی کرکٹر نے اپنے کیپشن میں لکھا کہ ’میں آنے والے گانے ’اکھیاں‘ کے لیے بے حد پُرجوش ہوں، امید ہےکہ یہ آپ سب کو پسند آئے گا۔
انہوں نے اپنے مداحوں سے اسے لائک، کمنٹ اور شیئر کرنے کی درخواست بھی کی۔
سوشل میڈیا پر متعدد کرکٹرز سمیت دیگر شوبز شخصیات اور مداحوں نے بلال آصف کے لیے نیک خواہشات کا اظہار بھی کیا۔
خیال رہے کہ اس سے قبل قومی کرکٹر بلال آصف کی گلوکاری کی ویڈیوز سوشل میڈیا پر وائرل ہوچکی ہیں۔
واضح رہے کہ بلال آصف نے 2015 میں زمبابوے کے خلاف ون ڈے ڈیبیو کیا تھا اور انہوں نے اب تک پاکستان کے لیے تین ون ڈے اور پانچ ٹیسٹ میچ کھیلے ہیں۔

January 18, 2020

نوجوان کھلاڑیوں کے لئے صلاحیتوں کا لوہا منوانے کا وقت آگیا’ اعجاز احمد

لاہور جدت ویب ڈیسک :قومی انڈر19 کرکٹ ٹیم کے ہیڈ کوچ اعجاز احمد نے کہا ہے کہ نوجوان کھلاڑیوں کے لئے صلاحیتوں کا لوہا مننوانے کا وقت آ گیا ہے ، پہلے وارم اپ میچ میں نائیجیریا جیسی قدرے کمزور ٹیم سے مقابلہ ہوا، حریف ٹیم کو 109 رنز پر ڈھیر کرنے کے بعد قومی انڈر19 ٹیم کے بلے بازوں کو بھی زیادہ مزاحمت کا سامنا نہیں کرنا پڑا۔میگا ایونٹ کی تیاریوں کے حوالے سے تبصرہ کرتے ہوئے انہوں نے کہا کہ اوپنر حیدر علی کی برق رفتار نصف سنچری کی بدولت پاکستان نے وارم اپ میچ میں 9وکٹوں سے کامیابی حاصل کی۔ اعجاز احمد نے کہا کہ سری لنکا انڈر 19 کرکٹ ٹیم کے خلاف وارم اپ میچ اصل پریکٹس میچ تھا تاہم فہد منیر کی نصف سنچری سمیت محمد حارث اور حیدر علی کی عمدہ بلے بازی کی بدولت قومی انڈر 19 ٹیم نے دوسرے وارم اپ میچ میں بھی باآسانی کامیابی حاصل کی۔قومی انڈر 19 کرکٹ ٹیم کے ہیڈ کوچ اعجاز احمد کا کہنا ہے کہ انڈر 19 ورلڈکپ میں ان کاپہلا ہدف گروپ مرحلے میں ٹاپ کرنا ہے تاکہ ٹیم کوارٹر فائنل بھی پوچیف اسٹروم میں کھیلے کیونکہ گروپ مرحلے کے اختتام پر دوسرے نمبر پر رہنے والی ٹیم کو اپنا کوارٹرفائنل میچ جوہانسبرگ میں کھیلنا ہوگا ، امید ہے کہ نوجوان کھلاڑی جلد پوچیف اسڑوم کی کنڈیشنز سے ہم آہنگ ہوجائیں گے۔ہیڈ کوچ نے کہاکہ جنوبی افریقہ پہنچنے کے اگلے روز ہی قومی انڈر 19 ٹیم نے اپنا پہلا وارم اپ میچ کھیلا، جس کے باعث نوجوان کرکٹرز کی بالنگ میں ردھم کی کمی نظر آئی ،سری لنکا کے خلاف عباس آفریدی ، محمد عامر خان، عامر علی اورطاہر حسین نے نپی تلی بالنگ کا مظاہرہ کیا ، اس دوران قاسم اکرم اور فہد منیر نے بھی ان کا بھرپور ساتھ دیا۔اعجاز احمد کا کہنا ہے کہ قومی انڈر 19 اسکواڈ میں نوجوان اور باصلاحیت کھلاڑی شامل ہیں۔ انہوں نے کہا کہ جنوبی افریقہ پہنچنے سے قبل تمام کھلاڑیوں نے نیشنل کرکٹ اکیڈمی لاہور میں منعقدہ طویل دورانیئے کے تربیتی کیمپ میں شرکت کی۔ اعجاز احمد نے کہا کہ اب وقت آگیا ہے کہ نوجوان کھلاڑی اپنی صلاحیتوں کا لوہا منوانے کے لئے ایک قدم آگے آئیں۔

January 18, 2020

پاکستان کیخلاف ٹی ٹوئنٹی سیریز کیلئے بنگلہ دیشی ٹیم کا اعلان, ٹکٹوں کی آن لائن فروخت شروع

جدت ویب ڈیسک ::۔۔۔بنگلہ دیش نے پاکستان کیخلاف ٹی ٹوئنٹی سیریز کے لیے ٹیم کا اعلان کر دیا۔ بنگلہ دیشی ٹیم کی کمان محموداللہ کے سپرد کردی گئی۔ تمیم اقبال کی پاکستان کیخلاف ٹی ٹوئنٹی سیریز میں واپسی ہوئی ہے۔
پاکستان کے خلاف 3 ٹی ٹوئنٹی میچوں کے لئے بنگلہ دیشی ٹیم کے اسکواڈ میں کپتان محمود اللہ، تمیم اقبال، سومیاسرکار، محمد نعیم، نجم الحسین، لیتون داس، محمد میتھون، عفیف حسین، مہدی حسن، امین السلام، مشفیق الرحیم، سیف السلام، الامین حسین، روبیل حسین اور حسن محمد شامل ہیں۔
دوسری جانب بنگلہ دیش اورپاکستان ٹی ٹونٹی سیریز کی تیاریاں عروج پرہیں، بنگلہ دیش کیخلاف ٹی 20 سیریز کیلئے ٹکٹوں کی آن لائن فروخت شروع ہوگئی۔ قذافی اسٹیڈیم میں ہونیوالے تینوں ٹی 20 میچوں کے ٹکٹ دستیاب ہیں۔آئن لائن ٹکٹوں کی قیمت 500 سے 4 ہزار تک رکھی گئی ہے۔ نجی کورئیرسروس سنٹر پر21 جنوری سے ٹکٹوں کی فروخت کا آغاز ہو گا۔
ٹریننگ کیمپ میں قومی کھلاڑیوں کی دوسرے روز بھی پریکٹس جاری ہے ،پاکستان اوربنگلہ دیش کے درمیان پہلا ٹی 20 سیریز کا آغاز 24جنوری کو کھیلا جائے گا۔
بنگلہ دیش کے بیٹنگ کوچ نیل میکینزی اور فیلڈنگ کوچ ریان کک دورہ پاکستان سے دستبردار ہو گئے، بنگلہ دیش کے کوچنگ اسٹاف کے پانچ ممبرز ٹیم کے ہمراہ پاکستان نہیں آئیں گے، ہیڈ کوچ رسل ڈومنگو اور فزیو جولین کالیفاٹو پاکستان آئیں گے۔

January 15, 2020

اسنوکر ورلڈ چمپئن محمد آصف اور بابر مسیح کے درمیان نمائشی میچ جمعرات کھیلا جائیگا

اسلام آباد جدت ویب ڈ یسک :اسنوکر ورلڈ چمپئن محمد آصف اور بابر مسیح کے درمیان نمائشی میچ جمعرات کو اسلام آباد میں کھیلا جائیگا۔ اسلام آباد بلیئرڈ اینڈ اسنوکر ایسوسی ایشن کے سیکرٹری جنرل فہیم انور خان کے مطابق اسلام آباد بلیئرڈ اینڈ اسنوکر ایسوسی ایشن کے زیر اہمام جاری ابسا کپ2020 کی اختتامی تقریب کے موقع پر یہ نمائشی میچ پاکستان سپورٹس کمپلیکس اسلام آباد کے سنوکر ہال میں کھیلا جا رہا ہے جس کے مہمان خصوصی پاکستان میں جاپان کے سفیر کونینوری مٹسوڈاہونگے جبکہ وفاقی پارلیمانی سیکرٹری سائنس و ٹیکنالوجی پرنس محمد نواز، اسلام آباد بلیئرڈ اینڈ اسنوکر ایسوسی ایشن کے صدر سینیٹر ڈاکٹر شہزاد وسیم، سینئر نائب صدر سلیم اختر رانا سمیت دیگر شخصیات شرکت کرے گی۔ انہوں نے بتایا کہ ابسا کپ کی مختلف کیٹگریز میں دو سو سے زائد کیوئسٹ نے حصہ لیا اور ٹورنامنٹ کے دوران شاندار مقابلے دیکھنے کو ملیں جبکہ ایسوسی ایشن مستقبل میں بھی نوجوانوں کیلئے ایسے ٹورنامنٹس کے انعقاد کا سلسلہ جاری رکھے گی ۔

January 15, 2020

بنگلہ دیش کرکٹ بورڈ نے ہاں کردی ، معاملات طے پا گئے

جدت ویب ڈیسک ::بنگلہ دیش کرکٹ بورڈ نے’’ ہاں‘‘ کر دی بنگلہ دیشی کرکٹ ٹیم لاہور،کراچی اور راولپنڈی میں دو ٹیسٹ،تین ٹی ٹوئنٹی اور ایک ون ڈے میچ کھیلنے کیلئے تین مرحلوں میں پاکستان آئے گی۔پی سی بی اور بی سی بی میں تمام معاملات طے پاگئے ۔شیڈول جاری کردیا گیا۔
شائقین کرکٹ کیلئے خوشخبری ہے کہ بنگلہ دیش ٹیسٹ،ون ڈے اور ٹی ٹوئنٹی سیریز کھیلنے کیلئے پاکستان آنے پر راضی ہوگیا۔ یہ فیصلہ دبئی میں پاکستانی اور بنگلہ دیش کرکٹ بورڈ کے اعلیٰ حکام کے درمیان ملاقات میں طے پایا جس میں آئی سی سی کے چیئرمین ششانک منوہر نے معاونت کی ۔
پی سی بی کی جانب سے جاری کردہ شیڈول کے مطابق بنگلہ دیش ٹیم لاہورمیں تین ٹی 20،ایک ون ڈے اور 2ٹیسٹ میچ کھیلے گی ۔پہلا ٹی 20میچ 24جنوری ،دوسرا ٹی 20میچ 25جنوری اور تیسرا ٹی 20میچ 27جنوری کو کھیلا جائے گا۔
پی ایس ایل فائیو کے اختتام پر پاکستان اور بنگلہ دیش کے درمیان واحد ون ڈے انٹرنیشنل میچ تین اپریل کو کراچی میں کھیلا جائے گا۔
پاکستان اور بنگلہ دیش کے درمیان آئی سی سی ٹیسٹ چیمپئن شپ کا پہلا میچ 7سے 11فروری کے درمیان راولپنڈی اور دوسرا ٹیسٹ میچ 5سے 9اپریل کو کراچی میں کھیلاجائے گا،سی ای او پی سی بی وسیم خان کا کہنا ہے بنگلہ دیش کا تین بار پاکستان آنا اس بات کا ثبوت ہے کہ پاکستان کھیلوں کیلئے محفوظ اور پرامن ملک ہے۔