August 21, 2019

پاک انگلینڈ کرکٹ سیریز کا شیڈول جاری

جدت ویب ڈیسک :::پاکستان اور انگلینڈ کے درمیان آئندہ برس ہونے والی کرکٹ سریز کا پانچ ہفتوں پر مشتمل شیڈول جاری کر دیا گیا ہے جس میں ٹیسٹ اور ٹی 20 مقابلے ہوں گے۔
قومی کرکٹ ٹیم کا دورہ انگلینڈ 30 جولائی سے شروع ہو کر دو ستمبر 2020 تک جاری رہے گا۔
دورے کے دوران 3 ٹیسٹ اور 3 ٹی 20 میچز کھیلے جائیں گے جب کہ مذکورہ 3 ٹیسٹ میچز ورلڈ ٹیسٹ چیمپئن شپ کا حصہ ہوں گے۔
پاکستان اور انگلینڈ کے درمیان پہلا ٹیسٹ میچ 30 جولائی سے 3 اگست 2020 تک لارڈز میں کھیلا جائے گا۔
دوسرا ٹیسٹ میچ 7 سے 11 اگست 2020 تک اولڈ ٹریفورڈ میں ہوگا اور تیسرا ٹیسٹ میچ 20 سے 24 اگست تک ٹرینٹ برج کرکٹ گراؤنڈ میں کھیلا جائے گا۔
دونوں ٹیمیوں کے درمیان پہلا ٹی20 مقابلہ 29 اگست کو لیڈز میں ہوگا، دوسرا 31 اگست 2020 کو کارڈف اور تیسرا ٹی 20 میچ 2 ستمبر 2020 کو ساؤتھ ہمپٹن میں ہوگا۔
پاکستان بورڈ کے ڈائریکٹر انٹرنیشنل کرکٹ ذاکر خان کا کہنا تھا کہ اس سیریز سے قومی کھلاڑیوں کو ٹیسٹ فارمیٹ میں بہتری کا موقع ملے گا اور آسٹریلیا میں شیڈول آئی سی سی ٹی 20 ورلڈ کپ کی تیاریوں میں بھی مدد ملے گی۔ان کا کہنا تھا کہ 4 سالوں میں تیسری دو طرفہ سیریز کا انعقاد پی سی بی اور ای سی بی کے درمیان دوستانہ تعلقات کی عکاسی کرتا ہے۔
ذاکر خان نے بتایا کہ انگلینڈ کرکٹ ٹیم سال 2022 میں پاکستان کا جوابی دورہ کرے گی۔ جوابی سیریز میں 3 ایک روزہ اور 3 ٹیسٹ میچز کھیلے جائیں گے۔

August 20, 2019

زندگی کا نیا سفر شروع کرنے پر ثانیہ مرزا کی حسن علی اور سامعیہ کو مبارکباد

لاہور جدت ویب ڈیسک ::: بھارتی ٹینس اسٹار اور قومی کرکٹ ٹیم کے سابق کپتان کی اہلیہ ثانیہ مرزا نے زندگی کا نیا سفر شروع کرنے پر حسن علی کو مبارکباد دیتے ہوئے نیک خواہشات کا اظہار کیا، حسن علی آج بھارتی لڑکی سامعیہ آرزو کے ساتھ رشتہ ازدواج میں منسلک ہوجائیں گے۔
تفصیلات کے مطابق بھارتی لڑکی سامعہ سے نکاح کے موقع پر ٹینس اسٹار ثانیہ مرزا نے حسن علی اور ان کی اہلیہ کو مبارکباد دیتے ہوئے نیک خواہشات کا اظہار کیا ہے۔
یاد رہے کہ حسن علی نے سماجی رابطوں کی ویب سائٹ پر ایک تصویر شیئر کرتے ہوئے لکھا تھا کہ غیر شادی شدہ ہونے کا آخری دن، جس کے جواب میں شعیب ملک کی اہلیہ اور بھارتی ٹینس اسٹار نے دونوں میں عمر بھر کےلئے پیار اور خوشیاں برقرار رہنے کی دعا اور ساتھ ہی اچھی سی دعوت کا مطالبہ بھی کردیا۔

August 16, 2019

پشاور زلمی کے چیئرمین جاوید آفریدی کیلئے اعلیٰ صدارتی ایوارڈ کا اعلان

اسلام آباد: جدت ویب ڈیسک :: حکومتِ پاکستان نے پی ایس ایل کی سب سے مقبول فرنچائز پشاور زلمی کے چیئرمین جاوید آفریدی کو ان کی خدمات کے اعتراف میں اعلیٰ صدارتی ایوارڈ ہلال امتیاز دینے کا اعلان کر دیا ہے۔
صدر پاکستان عارف علوی نے یوم پاکستان 14 اگست کے موقع پرجاوید خان آفریدی کو صدارتی ایوارڈ دینے کا اعلان کیا ہے۔
اس سلسلے میں جاوید آفریدی نے اپنے خیالات کا اظہار کرتے ہوئے کہا کہ ’’ اگرچہ میں نے ملکی خدمت اور نوجوانوں کی پر جوش مگر بردبار رہنمائی کا بیڑہ اُٹھاتے وقت یہ عہد کیا تھا کہ کسی اعزاز، عہدے اور معاوضے سے بالا تر ہو کر قوم و ملک کی خدمت کروں گا‘‘
انہوں نے کہا کہ حکومت پاکستان نے اس اعزاز کا اہل سمجھ کر دراصل مجھے نہیں بلکہ میری فکر اور حوصلے کو داد دی ہے اور میں چاہوں گا کہ محبتوں، کامیابیوں اور ملکی نوجوانوں کی رہنمائی کا یہ قافلہ یو ں ہی رواں دواں رہے ‘‘۔یاد رہے کہ پشاور زلمی نے کھلیوں کے میدان میں نوجوانوں کی رہنمائی اور صحت مند قومی رویوں کو پروان چڑھانے میں کردار ادا کیا ہے۔
جاوید آفریدی نے پشاور زلمی سے منسلک ہر ممبر اور ہر کارکن کا تہہ دل سے شکریہ ادا کرتے ہوئے اس عزم کا اعادہ کیا کہ پشاور زلمی گزشتہ سے بڑھ کر ملکی خدمت اور عوام کی فلاح و بہبود اور نوجوانوں کی بہترین رہنمائی میں قومی ہراول دستے کا کردار ادا کرتی رہے گی۔
وزیراعظم عمران خان نے مبارکباد کے پیغام میں کہا کہ جاوید آفریدی پاکستان میں نوجوانوں کے رول ماڈل کے طور پر ابھرے ہیں اور پشاور زلمی اور زلمی فاونڈیشن کھیلوں کے فروغ کے لیے بہترین کام کررہے ہیں۔