September 25, 2020

ایان علی کا آدھی سالانہ آمدن فلاحی ادارے کو عطیہ کرنے کا اعلان

دبئی :جدت ویب ڈیسک :ماڈل وگلوکارہ ایان علی نے اپنی سالانہ آمدن کا نصف حصہ منافع فلاحی ادارے کو دینے کا اعلان کیا ہے۔منی لانڈرنگ کیس میں ملوث ماڈل و گلوکارہ ایان علی نے انسٹاگرام پر کہا دوستوں میں اس بات پر یقین رکھتی ہوں کہ آپ کی زندگی میں جو کچھ بھی ہوتا ہے وہ آپ کو بہتری کی طرف لے جاتا ہے۔ یہ میرے لیے اعزاز کی بات ہے کہ میں آپ سے وہ چیز شیئر کرنے جارہی ہوں جو میں ہمیشہ سے کرنا چاہتی تھی۔ایان علی نے کہا میں ہمیشہ سوچتی تھی کہ آپ کے آس پاس موجود منفی چیزوں کے باوجود دنیا کو ایک بہتر جگہ کس طرح بنایا جاسکتا ہے اور میرے خیال میں اس سے بہتر آئیڈیا اور کوئی نہیں ہوسکتاتھا۔ میں نے فیصلہ کیا ہے کہ اب سے میرے پہلے میوزک البم نتھنگ لائک ایوری تھنگ اور کسی بھی دوسرے پراجیکٹ جو کہ میں مستقبل میں کروں گی کی رائلٹی سے ہونے والی سالانہ آمدنی کا 50 فیصد منافع بی مائی فرینڈ فانڈیشنکو عطیہ کروں گی۔

September 24, 2020

سونو نگم نے سجاد علی کو اپنا پسندیدہ گلوکار قرار دیدیا

ممبئی: جدت ویب ڈیسک :بھارتی گلوکار سونونگم نے پاکستانی گلوکار سجاد علی کو قابل عزت اور اپنا پسندیدہ گلوکار قرار دیتے ہوئے ان کے ساتھ گزارے گئے خوش گوار لمحات کی چند تصاویر شیئر کی ہیں۔سونو نگم نے گزشتہ روز انسٹاگرام پر سجاد علی کے ساتھ چند تصاویر شیئر کیں اور ان تصاویر کا پس منظر بتاتے ہوئے کہا کہ یہ تصاویر 19 مارچ کو لی گئی تھیں جب عدیل فاروق ہمیں عاطف علی کے اسٹوڈیو کا جائزہ لینے کے لیے لے کر گئے تھے۔ اتفاق سے وہاں سب سے زیادہ قابل احترام گلوکارو موسیقار اور میرے سب سے زیادہ پسندیدہ سجاد علی بھائی بھی اپنے بیٹے کے ہمراہ موجود تھے۔سونو نگم نے سجاد علی کی تعریف کرتے ہوئے کہا کہ مجھے سجاد علی کی یہ بات بہت اچھی لگی کہ وہ وہاں ہمارا انتظار کررہے تھے تاکہ ہم پہلی بار ملاقات کرسکیں۔ ہم لوگوں نے وہاں ڈیڑھ گھنٹے تک باتیں کیں۔ میں اس شام کی چند یادگار تصاویر آپ لوگوں کے ساتھ شیئر کررہاہوں۔سونو نگم نے سجاد علی کا گانا کٹنا نئیں کو ان کا اور ان کے گھروالوں کا پسندیدہ گانا قرار دیتے ہوئے کہا کہ اس گانے کو ان کی بہن نے بھی کور کیا تھا۔ لیکن اس سے پہلے میں نے سجاد بھائی سے اس گانے کو کور کرنے کی اجازت لی تھی اور انہوں نے نہ صرف اجازت دے دی تھی بلکہ معاوضہ بھی نہیں لیا تھا۔واضح رہے کہ کچھ روز قبل بھی سونو نگم نے ایک ویڈیو شیئر کی تھی جس میں وہ پاکستان کی ننھی گلوکارہ ہادیہ ہاشمی کا گانا سن کر رو پڑے تھے اور کہا تھا کہ بہت دنوں بعد کسی آواز نے میرے دل کو چھوا ہے۔

September 23, 2020

مہوش حیات کا محنتی خواتین کی ہمت بندھاتے پیغام جاری

اسلام آباد:جدت ویب ڈیسک : اداکارہ مہوش حیات نے محنتی خواتین کی ہمت بندھاتے ہوئے پیغام جاری کردیا۔ میڈیا رپورٹ کے مطابق مہوش نے سوشل میڈیا پر اپنی نئی تصویر جاری کی جس میں وہ کالے رنگ کے جوڑے میں ملبوس دیوار کے سامنے کھڑی ہیں جبکہ دیوار پر پرندے کے پر بنے ہوئے ہیں۔ اداکارہ نے تصویر شیئر کرتے ہوئے لکھا کہ ایک باہمت خاتون اپنے دشمنوں پر فتح حاصل کرتے ہوئے اپنے مستحکم ارادوں اور کامیابی کی اڑان بھرتے ہوئے اپنے نشانات چھوڑ جاتی ہے۔ مہوش حیات جہاں فن اداکاری میں اپنی صلاحیتیں منوا رہی ہیں وہیں سماجی و سیاسی معاملات میں بھی اپنی منفرد رائے رکھتی ہیں جس کا وہ وقتا فوقتا اظہار کرتی رہتی ہیں۔ گزشتہ دنوں کراچی میں بارشوں کے بعد پیدا ہونے والی صورتحال پر اداکارہ نے شدید برہمی کا اظہار کیا، ان کا کہنا تھا کہ جب بھی کراچی میں بارش ہوتی ہے تو پورے شہر کو ناقص انتظامی صورتحال کا سامنا کرنا پڑتا ہے۔ انہوں نے حکام سے شہریوں کے مسائل حل کرنے کا مطالبہ کیا۔ اسی طرح کشمیر میں بھارتی مظالم پر بھی مہوش حیات خاموش نہیں رہتیں۔ مقبوضہ کشمیر میں ماہ جولائی کے دوران نواسے کے سامنے نانا کی بھارتی فوج کی فائرنگ سے شہادت پر عالمی برادری کی مجرمانہ خاموشی کی شدید مذمت کی۔

September 21, 2020

وزیراعظم سینما انڈسٹری کی بحالی کے ساتھ ساتھ میوزک انڈسٹری کی بھی بحالی میں اپنا کردار ادا کریں۔گلوکار و موسیقار بلال مقصود

کراچی: ویب ڈیسک ::مشہور و معروف پاپ بینڈ اسٹرنگز کے گلوکار و موسیقار بلال مقصود کا کہنا ہے کہ میں نے اخبار میں دیکھا وزیراعظم عمران خان نے ایک اجلاس کے دوران ملک میں سینما کی بحالی کے لیے ہدایات دی ہیں، یہ ایک اچھی بات ہے تاہم یہ بھی بتایا جائے کے ایک موسیقار کے لیے اس ملک میں کیا ہے اور ہماری اہمیت کیا ہے، ایک عام تاثر یہ ہے کہ ہم بہت برا کام کررہے ہیں۔مشہور گلوکار و موسیقار بلال مقصود کا کہنا ہے کہ وزیراعظم سینما انڈسٹری کی بحالی کے ساتھ ساتھ میوزک انڈسٹری کی بھی بحالی میں اپنا کردار ادا کریں۔
بلال مقصود نے کہا کہ اگر حکومت کا ہمارے بارے میں تاثر بھی یہی ہے تو بتادیں تاہم مجھے نہیں لگتا کہ عمران خان کی ایسی سوچ ہے کیوں کہ ان کے دنیا میں بڑے بڑے موسیقاروں کے ساتھ رابطے ہیں، لہذا ہمیں ایسے پلیٹ فارم مہیا کیے جائیں جہاں سے عوام کی موسیقاروں کے بارے میں ذہنیت تبدیل ہو اور موسیقاروں کو ڈر ڈر کر کہیں بھی قدم نہ رکھنا پڑے۔
موسیقار بلال مقصود نے کہا کہ ہمیں ہر جگہ دشمنی کا سامنا کرنا پڑتا ہے، چاہے سوشل میڈیا ہو یا کوئی کنسرٹ ہو لہذا اگر اسی ذہنیت کے ساتھ ہم چلتے رہے تو موسیقی پاکستان سے ختم ہوجائے گی۔

 

September 21, 2020

ملائکہ اروڑا کورونا وائرس کو شکست دینے میں کامیاب ہوگئیں

ممبئی: جدت ویب ڈیسک :بالی ووڈ فلم انڈسٹری کی معروف فنکارہ ملائکہ اروڑا کا دو ہفتوں بعد کورونا وائرس ٹیسٹ منفی آگیا ہے جس کے بعد قرنطینہ سے اپنے اہل گھر والوں میں منتقل ہوگئی ہیں۔سماجی رابطے کی ویب سائٹس انسٹاگرام پر ملائکہ اروڑا نے اپنے مداحوں کو خوشخبری سنائی کہ وہ مکمل طور پر صحت یاب ہیں اور کورونا کو شکست دینے کے بعد اپنے کمرے سے باہر کی دنیا میں واپس آگئی ہیں۔آئٹم سانگ پر رقص سے شہرت حاصل کرنے والی چھیاں چھیاں گرل نے مزید لکھا کہ معمولی درد اور ہلکی علامتوں کے ساتھ موزی وائرس کو شکست دینے پر میں خود کو خوش قسمت سمجھتی ہوں جس پر اپنے معالجین، اہل خانہ، ہمسائے اور مداحوں کا خصوصی شکریہ ادا کرتی ہوں۔قبل ازیں قرنطینہ کے دوران انسٹاگرام پر ہی فنکارہ نے ایک تصویر پوسٹ کی تھی جس میں ان کا بیٹا گھر کے باہر کی دیوار سے اپنی والدہ کو دیکھ رہا ہے۔ ملائکہ اروڑا نے ان لمحات کو درد ناک قرار دیتے ہوئے لکھاتھا کہ ہم نے ان حالات میں جینا سیکھ لیا ہے اور ایک دوسرے کے پیغامات کو سمجھ لیتے ہیں۔

September 20, 2020

میرا کی اسٹیج پرفارمنس کے دوران فائرنگ کرنیوالے ملزمان گرفتار

فیصل آباد:جدت ویب ڈیسک : اداکارہ میرا کے اسٹیج ڈرامے کے دوران تھیٹر کے باہر فائرنگ کرنے والے ملزمان کو پولیس نے چار ساتھیوں سمیت گرفتار کرلیا۔فیصل آباد میں فیکٹری ایریا کے علاقے میں تقریبا ایک ہفتے قبل اداکارہ میرا کی اسٹیج پرفارمنس کے دوران فائرنگ کرکے فرار ہونے والے نامعلوم موٹرسائیکل سوار دو ملزمان کو تھانہ فیکٹری ایریا پولیس نے چار ساتھیوں سمیت گرفتار کرلیا ہے۔گرفتار ہونے والے ملزمان میں عادل اعوان، شعیب، اسد اور سمیع اللہ شامل ہیں۔ پولیس کے مطابق ملزمان ڈکیتیوں اور بھتہ خوری کے متعدد مقدمات میں ملوث رہ چکے ہیں اور انہوں نے سنیما کی ساکھ کو نقصان پہچانے کے لیے فائرنگ کی۔ گرفتار ہونے والے چاروں افراد کو حوالات منتقل کرکے مزید تفتیش شروع کردی گئی ہے۔واضح رہے کہ ملزمان نے 12 ستمبر کو سبینہ تھیٹر کے باہر اداکارہ میرا کی پرفارمنس کے دوران فائرنگ کی تھی۔ فائرنگ کے واقعے کی سی سی ٹی وی فوٹیج بھی منظر عام پر آئی تھی جس میں دیکھا جاسکتا ہے کہ موٹرسائیکل سوار فائرنگ کر کے جاتے ہوئے سیکیورٹی گارڈ کی بندوق بھی چھین کر لے گئے تھے۔

September 20, 2020

وزیر اعظم ملک کی فلمی صنعت کو بحال کرنے کے مشن پرگامزن

اسلام آباد: جدت ویب ڈیسک :وزیر اعظم عمران خان نے متعلقہ وزارتوں کو ہدایت کی ہے کہ وہ ملک میں فلم انڈسٹری کے فوری بحالی کے لئے کوششیں کریں۔وزیر اعظم عمران خان نے ایک خصوصی اجلاس کی صدارت کی جس کے دوران کورونا وبا پھیلنے کی وجہ سے بند ہونے والے سینما اور فلم انڈسٹری کی فوری بحالی اور ملک بھر میں سینما گھر کھولنے پر تبادلہ خیال کیا گیا۔ وزیر اعظم کو اجلاس میں ملک میں بتدریج سینما گھروں کی کھولنے اور کووڈ-19 پروٹوکول پر سختی سے عمل درآمد کے بارے میں بتایا گیا۔اجلاس کے دوران وزیر اعظم نے اعلی معیار کا مقامی مواد تیار کرکے پاکستان کی فلمی صنعت کو بہتر بنانے پر زور دیا۔ انہوں نے متعلقہ وزارتوں کو ہدایت کی کہ وہ اس کے روشن مستقبل کے لئے روڈ میپ تیار کرنے پر کام کرے۔وزیراعظم عمران خان نے کہا نوجوان نسل کو شعور دینے کے لیے فلموں کے ذریعے اپنی ثقافت اور معاشرتی اقدار کو فروغ دینا ضروری ہے۔ بدقسمتی سے ، مقامی مواد کی کمی کی وجہ سے ہم نوجوانوں کو اپنی تاریخ نہیں دکھا پاتے۔