May 12, 2020

پی آئی اے نے برطانیہ کیلئے بھی خصوصی پروازوں کا سلسلہ شروع کر دیا

اسلام آباد جدت ویب ڈیسک :قومی ائیرلائن (پی آئی اے) نے برطانیہ کے لیے بھی خصوصی پروازوں کا سلسلہ شروع کردیا ہے۔ترجمان پی آئی اے کے مطابق قومی ائیرلائن پاکستانی نژاد برطانوی شہریوں کے لیے 11سے 17مئی تک 9 پروازیں آپریٹ کرے گی جس میں سے 7 اسلام آباد ،2 پروازیں لاہور سے روانہ ہوں گی۔ترجمان پی آئی اے کے مطابق خصوصی پروازیں پاکستان سے لندن، مانچسٹر اور برمنگھم کے لیے آپریٹ کی جائیں گی۔پی آئی اے شیڈول کے مطابق پہلی پرواز 11مئی کو اسلام آباد سے لندن روانہ ہوگئی ہے جبکہ لاہور سے 13 مئی کو خصوصی پرواز لندن روانہ ہوگی ،14مئی کو اسلام آباد سے لندن اور مانچسٹر کے لیے دو پروازیں آپریٹ کی جائیں گی۔15مئی کو لاہور سے مانچسٹر کے لیے خصوصی پرواز اڑان بھرے گی جب کہ 16 مئی کو اسلام آباد سے مانچسٹر اور برمنگھم کے لیے دو خصوصی پروازیں چلائی جائیں گی۔ اس کے بعد 17 مئی کو آخری پی آئی اے کی خصوصی پرواز اسلام آباد سے لندن روانہ ہو گی۔

May 5, 2020

وزرات ریلوے نے 10مئی سے محدود ریلوے آپریشن شروع کرنے پر غور شروع کر دیا

جدت ویب ڈیسک ::وزرات ریلوے نے 10مئی سے محدود ریلوے آپریشن شروع کرنے پر غور شروع کر دیا ، محدود آپریشن لاک ڈاؤن میں نرمی کے حکومتی فیصلے سے مشروط ہوگا۔ حکومتی اجازت ملتے ہی24ٹرینیں ابتدائی طور پر چلائی جائیں گی ، 7مئی کو ٹرین آپریشن بحال کرنے سے پہلے ریہرسل کی جائے گی ۔
وزارت ریلوے نےٹرین آپریشن کی تیاریاں مکمل کرنے کیلئے ریلوے انتظامیہ کو ہدایات جاری کر دیں ، ریلوے پہلے مرحلہ پر چاروں صوبوں میں 24خصوصی ٹرینیں خصوصی انتظامات کے ساتھ چلائے گا ۔
ٹرین آپریشن شروع ہونےپر مسافر ٹکٹ صرف آن لائن بکنگ کے ذریعے ہی حاصل کر سکیں گے، ٹرین کی 60 فیصد سیٹیں بک ہونے کے بعد بکنگ روک دی جائے گی تاکہ سماجی فاصلہ پالیسی پر سختی سے عمل کیا جائے ، خصوصی ٹرینیں چلنے کی صورت میں مسافروں کو ٹرین کی روانگی سے ایک گھنٹہ قبل سٹیشن پہنچنا ہوگا ، اسٹیشن سے 200 میٹر تک کے ایریا میں غیر ضروری افراد کے داخلہ پر پابندی ہوگی ۔
مسافروں کے پاس اپنے ماسک ، گلوز ، سینیٹائزر اور صابن ہونا لازمی ہو گا ، مسافروں کو سینیٹائزر واک تھرو گیٹ سے گزارا جائے گا جس میں ان پر سٹیشن میں داخلے سے قبل سینیٹائزر سپرے کیا جائے گا۔

May 3, 2020

ملک میں پیٹرولیم مصنوعات کی قلت کا کوئی خدشہ نہیں ۔۔۔وزارت توانائی برائے پیٹرولیم ڈویژن کا اعلامیہ جاری

اسلام آباد:جدت ویب ڈیسک :: ملک بھر میں پیٹرولیم مصنوعات کی قیمتیں کم ہونے کے بعد خریداری میں ریکارڈ اضافہ ہوا جس کے بعد افواہیں گردش کرنے لگیں کہ پاکستان میں پیٹرولیم مصنوعات کی قلت کا خدشہ پیدا ہوگیا ہے۔

وزارت توانائی برائے پیٹرولیم ڈویژن کی جانب سے جاری اعلامیے کے مطابق ملک میں پیٹرولیم مصنوعات کی قلت کا کوئی خدشہ نہیں ہے کیونکہ پیٹرول کا 2 لاکھ 85 ہزار ٹن اور ڈیزل کا 3 لاکھ پچاس ہزار ٹن کا اسٹاک موجود ہے جو آئندہ 15 روز کی طلب پوری کرنے کے لیے کافی ہے۔

اعلامیے کے مطابق پاکستان اسٹیٹ آئل کے لیے پیٹرول اور ڈیزل لانے والے دو جہاز پورٹ قاسم بندرگاہ پر لنگر انداز ہوچکے ہیں جن میں 50 ہزار ٹن پیٹرول اور 55 ہزار میٹرک ٹن ڈیزل موجود ہیں۔

وزارت توانائی برائے پیٹرولیم ڈویژن نے عوام سے اپیل کی کہ پیٹرولیم مصنوعات کی ضرورت سے زیادہ خریداری سے گریز کریں کیونکہ ملک میں پیٹرولیم مصنوعات کی قلت کا کوئی خدشہ نہیں ہے۔

اعلامیے میں بتایا گیا ہے کہ پیٹرول ڈیزل کی قیمتوں میں کمی کی وجہ سے یکم اور دو مئی کو ملک بھر میں پیٹرولیم مصنوعات کی خریداری میں نمایاں اضافہ دیکھا گیا، پیٹرول پمپس نے طلب کے لحاظ سے ایندھن کی خریداری نہیں کی تھی جس کی وجہ سے وقتی قلت پیدا ہوئی۔

یاد رہے کہ وزارت خزانہ نے 30 اپریل کو پٹرولیم مصنوعات کی قیمتوں میں 15سے30روپے کمی کا اعلان کیا تھا۔

April 30, 2020

پٹرولیم مصنوعات کی قیمتوں میں ردوبدل کے بعد پٹرولیم مصنوعات کی فروخت میں تیزی آئیگی

اسلام آباد جدت ویب ڈیسک :یکم مئی سے پٹرولیم مصنوعات کی قیمتوں میں ردوبدل کے بعد مئی کی پہلے ہفتے میں پٹرولیم مصنوعات کی فروخت میں تیزی آئے گی۔ پٹرولیم ڈویژن نے آئل مارکینٹنگ کمپنیوں کو اپنے ڈپوز اور پمپس پر تیل کے مناسب ذخائر یقینی کی ہدایت جاری کر دی۔ جمعرات کو پٹرولیم ڈویژن کی طرف سے آئل کمپنیز ایڈوائزری کونسل کو لکھے گئے خط میں کہا گیا کہ پٹرولیم مصنوعات کی قیمتوں ردوبدل کے بعد مئی کے پہلے ہفتے میں پٹرولیم مصنوعات کی زیادہ فروخت متوقع ہے ،خط میں آئل مارکیٹنگ کمپنیوں کو ہدایت کی گئی کہ وہ اپنے ڈپوز اور پمپس پر تیل کے مناسب ذخائر یقینی بنائیں ۔پٹرولیم ڈویژن نے کہا کہ تمام آئل مارکیٹنگ کمپنیان اور ریفائنریز یکم مئی کو بھی اپنے آپریشنز جاری رکھیں ،آئل کمپنیز ایڈؤائزری کونسل سے کہا گیا کہ ان ہدایات پر سختی سے عمل درآمد کیلئے تمام آئل مارکیٹنگ کمپنیون اور ریفائنریز کو آگاہ کرے۔

April 29, 2020

عوام کےلیے بڑی‌ خبر آگئی۔پیٹرول کی قیمت میں کتنی کمی کا امکان ہے؟

اسلام آباد : ویب ڈیسک ::یکم مئی سے پیٹرول کی قیمت میں 20 روپے68 پیسے فی لیٹر تک کمی کا امکان ہے، اوگرا کی جانب سے پٹرولیم مصنوعات کی قیمتوں میں کمی کی سمری ارسال کردی گئی ہے۔
تفصیلات کے مطابق حکومت کی جانب سے عوام کیلئے بڑے ریلیف کی تیاری کرلی گئی، یکم مئی سے پیٹرولیم مصنوعات کی قیمتوں میں بڑی کمی کا امکان ہے۔
اوگرا کی جانب سے پٹرولیم مصنوعات کی قیمتوں میں کمی کی سمری وزارت پیٹرولیم اور خزانہ کو ارسال کر دی ، جس میں پٹرولیم مصنوعات 44 روپے فی لیٹر تک سستی کرنے کی سفارش کی گئی ہے۔
سمری کے مطابق اوگرا نے پٹرول کی قیمت میں 20 روپے 68 پیسے فی لیٹر کمی ، ہائی اسپیڈ ڈیزل کی قیمتوں میں 33 روپے94 پیسے کمی کی تجویز دی ہے جبکہ ہائی اسپیڈ ڈیزل کی قیمتوں میں 33 روپے94 پیسے کی کمی اور مٹی کے تیل میں 44 روپے 7پیسے فی لیٹر کمی کی سفارش کی ہے۔
وزیراعظم کی منظوری کے بعد وزارت خزانہ پٹرولیم مصنوعات کی قیمتوں میں کمی کا اعلان کل کرے گا۔

April 29, 2020

بڑی فضائی کمپنیاں بھی کورونا وائرس کے باعث بحران کا شکار

جدت۔ ویب ڈیسک ::کورونا وائرس کے باعث بڑی فضائی کمپنیاں بھی بحران کا شکار ہو گئیں اور ملازمین کو فارغ کرنے لگیں۔
برٹش ایئر ویز نے 12 ہزار ملازمتیں ختم کرنے کا اعلان کر دیا۔ برطانوی فضائی کمپنیوں نے ٹریڈ یونینز کو ری اسٹرکچرنگ اور ملازمتوں کے خاتمے سے متعلق آگاہ کر دیا۔
ادھر آئس لینڈ کی ایئر لائن نے بھی مالی نقصان سے بچنے کیلئے 2 ہزار ملازمتیں ختم کر دیں۔
دوسری طرف دنیا بھر میں کورونا وائرس سے ہلاکتوں کی تعداد تقریباً دو لاکھ اٹھارہ ہزار ہو گئی۔ اکتیس لاکھ سے زائد افراد متاثر ہیں۔ روس میں کورونا وائرس کا پھیلاؤ تیز ہو گیا جہاں 24 گھنٹوں کے دوران 73 مریض ہلاک ہوئے جب کہ متاثرین کی تعداد ساڑھے 93 ہزار سے بڑھ چکی ہے۔ روسی صدرولادی میر پیوٹن نے کورونا وائرس کی صورتحال کو پیچیدہ قرار دیتے ہوئے لاک ڈاؤن میں گیارہ مئی تک توسیع کر دی۔
کورونا نے امریکا میں تباہی مچا دی۔ چوبیس گھنٹوں میں ڈھائی ہزار کے قریب افراد جان سے گئے جس کے بعد ہلاکتوں کی تعداد 59 ہزار سے بڑھ گئی۔ برطانیہ میں مزید 586، اٹلی 382، فرانس 367،اسپین میں 301 اموات ہوئیں۔ سعودی عرب میں 1266 نئے کیس رپورٹ ہوئے جس سے مجموعی تعداد بیس ہزار 77 ہو گئی جبکہ مزید 8 مریض جاں بحق، اموات 152 تک پہنچ گئیں