July 25, 2017

غربت کے خاتمے ،خطے میں ترقی کے لئے ،نوجوانوں کو سہولیات اور مراعات کے ساتھ مواقع فراہم کئے جائیں ‘شہریار علی ملک

لاہو رجدت ویب ڈیسک :سارک چیمبر آف کامرس اینڈ انڈسٹری ینگ انٹرپرینیورز کے چیئرمین شہریار علی ملک نے نوجوانوں کو سہولیات اور مراعات کے ساتھ ساتھ مواقع فراہم کرنے کی ضرورت پر زور دیا ہے تاکہ وہ جنوبی ایشیائ سے غربت کے خاتمے اور خطے میں ترقی و جدت کے لئے اپنا کردار ادا کرسکیں۔ان خیالات کا اظہار انہوں نے یہاں سارک چیمبر آف کامرس کی ایگزیکٹو کمیٹی کے 70ویں اجلاس میں علاقائی ترقی کے لئے ینگ انٹرپرینیورز کے کردار کے حوالے سے منعقدہ سیشن سے خطاب کرتے ہوئے کیا۔انہوں نے کہاکہ جنوبی ایشیائ کے نوجوانوں کو جدید تکنیکی تعلیم سے آراستہ کرنے کی ضرورت ہے تاکہ وہ اپنے اور دوسروں کے لئے روزگار کاباعث بن سکیں۔ انہوں نے کہاکہ سارک کے خطے کو غربت اور بیروز گاری جیسے یکساں مسائل کا سامنا ہے۔ ان مسائل کو نوجوانوں کی صلاحیتوں میں بہتری اور نکھار پیدا کرکے اور ان کو ترقی دے کر کم کیاجاسکتا ہے۔ انہوںنے کہاکہ ہمارا خطہ بہتری کی طرف گامزن ہے۔نوجوانوں کو جدید تعلیم سے بہرہ ور کرکے نہ صرف غربت میں کمی لائی جا سکتی ہے بلکہ معاشی ترقی کی رفتار میں بھی بہتری لائی جاسکتی ہے۔ انہوں نے کہا غربت اور بیروزگاری ہمارے معاشرے کے بڑے مسائل ہیں اور خطے کے نوجوانوں کو ان مسائل سے چھٹکارا حاصل کرنے کے لئے مل کرکام کرناہوگا۔ انہوںنے کہاکہ سارک چیمبر آف کامرس اینڈ انڈسٹری رکن ممالک میں بیروزگاری اور غربت میں کمی لانے پر توجہ مرکوز کئے ہوئے ہے۔انہوں نے کہاکہ پاکستان نوجوانوں کی آبادی کے لحاظ سے دنیا کا پانچواں بڑاملک ہے۔ انہوں نے کہاکہ اقوام متحدہ کے پاپولیش فنڈز کی رپورٹ کے مطابق پاکستان کی کل آبادی 200ملین میں سے 63 فیصد نوجوانوں پر مشتمل ہے جن میں سے 58.5فیصد ایسے نوجوان ہیں جن کی عمر 20سے 24سال ہے۔ انہوںنے کہاکہ جنوبی ایشیائ کے ممالک بالخصوص سارک بالعموم نوجوان کی ترقی اور بہتری کے لئے وسائل بروئے کار لانے کی ضرورت ہے۔انہوں نے کہاکہ معاشی ترقی سے نہ صرف جیو پولیٹیکل مسائل میں کمی آتی ہے بلکہ اس سے غربت میں کمی، سکولوں کانظام بہتر کرنے اور طویل المدتی پائیدار ترقی کی رفتار کوتیز کرنے میں مدد ملتی ہے جس سے لوگوںکا معیار زندگی بہتر ہوتا ہے۔ اس موقع پر موجود شرکائ نے سارک چیمبر آف کامرس اینڈانڈسٹری کے نائب صدر کی کاوشوں کو سراہتے ہوئے کہاکہ اس سے نوجوانو ں کی ترقی میں مدد ملے گی

July 25, 2017

تیل کی قیمتوں میں کمی، سعودی معیشت کمزور

جدت ویب ڈیسک : آئی ایم ایف نے کہا ہے کہ تیل کی قیمتوں میں کمی کے ساتھ سعودی معیشت کے کمزور پڑنے سے مشرق وسطی اور شمالی افریقہ میں معاشی نمو کی رفتار سست پڑنے کا خدشہ ہے۔گزشتہ روز جاری کردہ ورلڈاکنامک آٹ لک2017 اپ ڈیٹ رپورٹ کے مطابق رواں سال سعودی معیشت 0.1 فیصد کی رفتار سے ترقی کرے گی جو اپریل کی پیشگوئی سے 0.3 فیصد کم ہے، یہ سعودی معیشت کی 2009 کے بعد سے بدترین کارکردگی ہوگی جب عالمی معاشی بحران کے باعث معیشت 2 فیصد سکڑ گئی تھی۔آئی ایم ایف نے امید ظاہر کی کہ آئندہ سال خطے میں معاشی ترقی کی رفتار بڑھ کر 3.3 فیصد پر پہنچ جائے گی، سعودی معیشت بھی 1.1 فیصد کی رفتار سے ترقی کرے گی تاہم یہ بھی اپریل کی پیش گوئی سے 0.2 فیصد کم ہے۔ 2016 میں 5 فیصد ترقی کی غیرمتوقع کارکردگی کے بعد مشرقی وسطی و شمالی افریقہ کے ساتھ پاکستان اور افغانستان کی معیشتیں رواں سال 2.6 فیصد کی کم رفتار سے ترقی کریں گی، گزشتہ سال خطے کی اچھی اقتصادی کارکردگی کی بڑی وجہ زیادہ تیل پیداوار کی وجہ سے ایران کی 6.5 فیصد سے زیادہ کی ٹھوس معاشی ترقی تھی

July 25, 2017

سی ڈی ڈبلیوپی میں99.4 ارب روپے سے زائدمالیت کے 15ترقیاتی منصوبوں کی منظوری

اسلام آباد جدت ویب ڈیسک : سی ڈی ڈبلیوپی نے99.4 ارب روپے سے زائدمالیت کے 15ترقیاتی منصوبوں کی منظوری دے دی جبکہ 5میگا منصوبے مزید منظوری کے لیے ایکنک کوبھجوادیے گئے۔سینٹرل ڈیولپمنٹ ورکنگ پارٹی کا اجلاس وفاقی وزیر منصوبہ بندی احسن اقبال کی زیر صدارت ہوا، جس میں سی ڈی ڈبلیو پی نے ٹرانسپورٹ اینڈ کمیونیکیشن کے شعبے میں 43.8 ارب روپے کے4 منصوبے منظور کیے۔ منصوبوں میں7.3ارب روپے لاگت سے کوئٹہ دادھر این 56سیکشن کی بحالی اور اپ گریڈیشن، 4.7ارب روپے لاگت سے کیلاش ویلی کا47کلومیٹرسے زائد روڈ، 31.1ارب لاگت سے ریلو ے کی830 بوگی فریٹ اور250 مسافر کوچزکی تیاری اور78کروڑ80 لاکھ کی لاگت سے ریلو ے کے ملا زمین کے کوارٹرزکی تیاری کے منصوبے شامل ہیں، اسی طرح فزیکل پلاننگ و ہائوسنگ کے شعبے میں 36.1 ارب روپے لاگت کاکراچی سیوریج پلان بھی منظور کرلیاگیا، راولپنڈی اور چکلالہ کینٹ بورڈ کے رہائشی کوپانی کی فراہمی کے لیے 88کروڑروپے کی منظوری دیدی گئی۔وفاقی وزیراحسن اقبال نے کہاکہ کراچی سیوریج پلان منصوبہ انوائرمنٹ کیلیے انتہائی اہمیت کاحامل ہے۔ اسی طرح سینٹرل ڈیولپمنٹ ورکنگ پارٹی نے صحت کے شعبے میں4.7 ارب کے 2 منصوبوں سمیت گورننس کے شعبے میں 1.65 ارب کے 3 منصوبے منظور کرلیے، سی ڈی ڈبلیو پی نے گورننس کے شعبے میں 60کروڑ روپے لاگت سے پختونخوا میں سسٹین ایبل ڈیولپمنٹ گول یونٹ کے قیام کے منصوبے کی منظوری دی، 70کروڑ روپے لاگت سے پی ایس ڈی پی منصوبوں کی مانیٹرنگ کے منصوبے کی منظوری دی گئی اسی طرح زراعت کے شعبے میں 73کروڑ90لاکھ روپے لاگت سے نیشنل پیسٹی سائیڈ ریزائیڈسسٹم کا منصوبہ اورتعلیم کے شعبے میں2.9 ارب کا سائنس ٹیلنٹ فارمنگ اسکیم کا منصوبہ بھی منظور کر لیا گیا

July 25, 2017

فرٹیلائزر سبسڈی اسکیم کے تحت واجبات کی کلیئرنس و ایڈجسٹمنٹ کے لیے اعلی سطح کا اجلاس طلب

اسلام آبادجدت ویب ڈیسک : وفاقی حکومت نے فرٹیلائزر سبسڈی اسکیم کے تحت رواں مالی سال سمیت گزشتہ 2سال کے اربوں روپے کی سبسڈی واجبات کی کلیئرنس و ایڈجسٹمنٹ کے لیے اعلی سطح کا اجلاس طلب کرلیا۔ وزارت خزانہ کی جانب سے جمعہ کو وزارت خزانہ میں طلب کیے جانے والے اجلاس میں وفاق سمیت چاروں صوبوں کے سیکریٹریز خزانہ اور سیکریٹریز زراعت کے علاوہ ممبر نیشنل فرٹیلائزر ڈیولپمنٹ سینٹر اسلام آباد، چیئرمین فیڈرل بورڈ آف ریونیو اوراسٹیٹ بینک آف پاکستان کے ڈائریکٹر ایف ای اوڈی سمیت دیگر اعلی حکام شرکت کریں گے۔دستاویز میں بتایا گیاکہ 28جولائی کو بلائے جانے والے اجلاس میں سال 2015-16، سال 2016-17 اور سال 2017-18 کے لیے فرٹیلائزر سبسڈی اسکیموں سے متعلق مختلف مسائل زیر بحث آئیں گے۔ذرائع کا کہنا ہے کہ مذکورہ سبسڈی اسکیم کے تحت وفاق اور صوبوں نے سبسڈی میں حصہ ڈالنا تھا جبکہ کے پی کے سمیت بعض صوبوں کی جانب سے اس اسکیم کے تحت واجبات کی ادائیگی نہیں کی گئی، اس لیے اجلاس میں چاروں صوبوں کے فرٹیلائزر سبسڈی اسکیم کے تحت واجبات کی ادائیگی اور اسکی ایڈجسٹمنٹ کی کلیئرنس کا جائزہ لیا جائے گا اور جس صوبے کے ذمے جو واجبات ہوں گے ان کی یا تو ادائیگی کی جائے گی یا پھر بجٹ سے ایڈجسٹمنٹ کی جائے گی۔اجلاس میں وفاقی سیکریٹری نیشنل فوڈ سیکیورٹی اینڈ ریسرچ اسلام آباد، چیئرمین فیڈرل بورڈ آف ریونیو طارق پاشا سمیت دیگر وفاقی وصوبائی سیکریٹریز اور متعلقہ حکام شرکت کریں گے

 

July 24, 2017

ٹرین ڈرائیورز کی ہڑتال کے اثرات برقرار ، گاڑیاں تاخیر کا شکار

جدت ویب ڈیسک :۔سکھر میں لو کورننگ اسٹاف اینڈ ریلوے ڈرائیورز ویلفیر ایسوسی ایشن کے جنرل سیکرٹری علی حیدر چاچڑ نے میڈیا سے بات کرتے ہوئے کہا کہ وزیر ریلوے کو ہمارے مطالبات سے متعلق غلط بریفنگ دی گئی، ہمارے 7 نہیں 3 مطالبات ہیں جس میں سرفہرست برطرف ملازمین کی بحالی اور پے اسکیل بڑھانے سے متعلق ہے، مطالبات ہمارا قانونی اور آئینی حق ہے جس سے پیچھے نہیں ہٹیں گے۔ٹرین ڈرائیوروں نے تنخواہوں، مراعات میں اضافے اور گرفتار ساتھیوں کی رہائی کی یقین دہانی پر ہڑتال ختم کردی ہے لیکن گاڑیوں کی آمدورفت کا نظام درہم برہم ہونے سے تاحال مختلف ٹرینیں 2 سے 5 گھنٹے تاخیر کا شکار ہیں۔ترجمان ریلوے کے مطابق کراچی ایکسپریس 5 گھنٹے اور قراقرم 6 گھنٹے کی تاخیر سے لاہور پہنچے گی اور لاہور سے صبح 6 بجے چلنے والی شالمیار ایکسپریس ساڑھے10 بجے روانہ ہوئی۔کراچی سے لاہور آنے والی ٹرینیں بھی تاخیر کا شکار ہیں، گرین لائن ٹرین 2 گھنٹے اور تیز گام 3 گھنٹے کی تاخیر سے لاہور پہنچے گی۔ گزشتہ روز ہڑتال ختم کرنے کے بعد ایسوسی ایشن کے عہدیدار عرفان اقبال کا کہنا تھا کہ تنخواہوں، مراعات میں اضافے اور گرفتار ساتھیوں کی رہائی کے لیے ریلوے حکام اور ڈرائیورز ایسوسی ایشن میں مذاکرات ہوں گے۔اس سے قبل ریلوے ڈرائیورز ویلفیئر ایسوسی ایشن کی جانب سے مطالبات تسلیم نہ کئے جانے کے خلاف ہڑتال کی گئی جس کے باعث کراچی کینٹ اسٹیشن سے چلنے والی ٹرینیں مقررہ وقت پر روانہ نہ ہوسکیں اور مسافروں کو گھنٹوں اسٹیشن پر انتظار کرنا پڑا۔جب کہ ریل کا پہیہ روکنے والے 13 ڈرائیوروں کو حراست میں لیا گیا جن میں سے کئی کے خلاف دہشت گردی ایکٹ کے تحت مقدمہ درج کیا گیا ہے۔ریلوے ذرائع کے مطابق سکھر میں ڈرائیورز ویلفیئر ایسوسی ایشن کے عہدیداران کو مذاکرات کے لئے ڈی ایس آفس بلایا گیا جہاں تین افراد کو گرفتار کرلیا جن میں ایسوسی ایشن کے صدر محمد فاروق، چیئرمین محمد اقبال اور جنرل سیکرٹری لو کورننگ اسٹاف علی حیدر چاچڑ شامل ہیں

July 24, 2017

ایشیا کی سب سے بڑی مویشی منڈی،باضابطہ افتتاح اگست میں ہوگا

جدت ویب ڈیسک :ایشا ءکی سب سے بڑی عارضی مویشی منڈی میں قربانی کے جانور فروخت کے لیے لانے کا سلسلہ شروع ہوگیا، جمعہ کے روز11ٹرکوں پر مشتمل 2سو50 قربانی کے جانور کراچی پہنچ گئے۔ سپرہائی وے پر قائم ایشاءکی سب سے بڑی مویشی منڈی کے انتظامات کا سلسلہ جاری ہیں جب کہ مویشی منڈی کا باضابطہ افتتاح اگست کے مہنے میں ہوگا۔سہراب گوٹھ پر قائم کی جانے والی ایشیا کی سب سے بڑی مویشی منڈی کا انتظام سنبھالنے والی ارشاد اینڈ کمپنی کے ایڈمنسٹریٹر ارشاد احمد نے بتا یا کہ مویشی منڈی میں جانوروں کو رکھنے کے لئے بلاکس کو ہموار کرنے کا عمل جاری ہے ، جب کہ منڈی میںعوام کی سہولت کے لئے روشنی کے انتظاما ت کئے جا رہے ہے ۔ بڑی تعداد میں بجلی کے کھمبے اور اسٹریٹ لائٹ لگا ئی جارہی ہیں۔ اندرون ملک سے بیوپاری جانورلے کر ٹرک کراچی پہنچا نا شروع ہو گئے ہے جب کہ اندرون ملک اور سندھ سے جانوروں کے بیوپاری بھی کراچی آنے کے لئے نکل چکے ہیں ، جیسے جیسے جانور منڈی میں آئیں گے، انہیں مطلوبہ مقام پر جگہ فراہم کی جائے گی ، جب کہ شہریوں کی سہولت کے لئے منڈی میں سڑکوں اور گزرگاہوں کو ہموار کرنے کا سلسلہ بھی جاری ہے ، ان کا کہنا تھا کہ منڈی آنے والے شہریوں کی گاڑیاں پارک کرنے کے لئے بھی انتظامات کر لئے گئے ہیں۔ ہماری پوری کوشش ہے کہ اس دینی فریضہ کی ادائیگی کے لیے آنے والے اور مویشیوں کے بیوپاریوں کو جانوروں کی خرید و فروخت میں زیادہ سے زیادہ سہولتیں فراہم کریں۔ مشینری و کچرا اٹھانے والی گاڑیوں کے ذریعے علاقے کی صفائی ستھرائی اور دیگر انتظامات کا سلسلہ جاری ہیں۔اس سال قربانی کے جانوروں کی خریداری کے لےے آنے والے بیوپاریوں اور عوام کو خرید و فروخت میں ہرممکن سہولتیں فراہم کرنے کیلئے دیگر اداروں سے بھی تعاون کی درخواست کی گئی ہیں تاکہ مکمل منصوبہ بندی کے ذریعے ایک مربوط سسٹم کے تحت انتظامات کو حتمی شکل دی جاسکے۔ ان کا کہنا تھا کہ صفائی، ستھرائی اور جانوروں کی آمد کے آغاز کے بعد ہماری بنیادی ذمہ داری سہراب گوٹھ پر ایشیا کی سب سے بڑی مویشی منڈی کا قیام اور اسے بیوپاریوں اور خریداروں کیلئے محفوظ بنانا ہے۔ اس حوالے سے سندھ پولیس اور رینجرز سے درخواست کی گئی کہ وہ مویشی منڈی کے آس پاس گشت کے خصوصی انتظامات کریں۔ارشاد احمد نے کہا کہ منڈی میں صفائی ستھرائی کیلئے خصوصی عملہ منڈی میں دن رات کام کرے گا اور کچرا اٹھانے کے ٹرک اور دیگر مشینری ٹریکٹر وغیرہ منڈی سے روزانہ جانوروں کا فضلہ اور کوڑا کرکٹ صاف کریں گے تاکہ منڈی میں صا ف ستھرا ماحول یقینی بنایا جاسکے۔ اس کے علاوہ کسی ہنگامی امداد کیلئے ایمبولنس سروس اور فائر سروس کا بھی انتظام کیا جائے گا۔انہوں نے بیوپاریوں کو تاکید کرتے ہوئے کہا کہ تمام بیوپاری اپنے مویشیوں کو حفاظتی اقدامات کے تحت وائرس سے بچاؤ کے حفاظتی ٹیکے لگوا کر آئیں۔ اس عمل سے منڈی میں خریداروں اور مویشیوں کیلئے صحت مندانہ اور محفوظ ماحول مہیا کرنے میں مدد ملے گی۔ منڈی تقریباً 1200 ایکٹر پر قائم کی جائے گی۔ خریداروں کی آسانی کیلئے گائے، بکرے ، دنبے، اونٹ وغیرہ کی فروخت کے لیے انتظامات کئے جائیں گے اور منڈی کو بلاکس میں تقسیم کیا جائے گا۔ اس کے علاوہ پانی کی فراہمی، حفاظتی ٹیکوں، لائٹنگ وغیرہ کے بھی خصوصی انتظامات کئے جائیں گے جبکہ لین دین اور خریداری میں سہولتیں فراہم کرنے کے لیے بینکنگ سہولتیں بھی فراہم کی جائیں گی۔دوسری جانب عدالت عالیہ سندھ نے سپر ہائی وے پر مویشی منڈی قائم کر نے کے خلاف دائر درخواست پر کنٹونمنٹ بورڈ ملیر ، وزارت دفاع ، حکومت سندھ ودیگرسے22 جولائی تک جواب طلب کرلیا ہے درخواست گزار نے موقف اختیار کیا ہے کہ عیدالاضحی کے موقع پر سپر ہائی وے پر منڈی لگائی جارہی ہے جس کے بعد صفائی کراوئی نہیں جاتی اور سیکورٹی کا کوئی معقول انتظام نہیں ہوتا ہے منڈی سے ٹریفک جام رہتا ہے درخواسست گزار کے مطابق گزشتہ سال کمشنر کراچی نے یقین دہانی کرائی تھی کہ درخواست گزاروں کی شکایت دور کی جائے گی تاہم موجود ہ سال بھی صورتحال ماضی کی طرح ہے عدالت سے استدعا ہے کہ گوٹھ کے داخلی اور خارججی راستوں پر منڈی نہ لگانے کے احکامات جاری کئے جائیں ۔