April 4, 2020

لاک ڈاؤن ، کراچی میں گندم،چاول اوردیگرغذائی اجناس کے بحران کا خدشہ

کراچی : ویب ڈیسک :: شہر قائد میں لاک ڈاون اور کورونا کے سبب غذائی اجناس، دالوں ،چاول اور گندم کے بحران کا خدشہ پیدا ہوگیا۔
تفصیلات کے مطابق گڈر ٹرانسپورٹرز کا کہنا ہے کہ وزیراعظم کےاحکامات کےباوجود ہائی ویز پر مال بردار گاڑیوں کو زبردستی روکا جا رہا ہے ، جس کے باعث غذائی اجناس۔دالوں ۔چاول اور گندم کے بحران کا خدشہ پیدا ہوگیا ہے۔
ٹرانسپورٹرز کے مطابق لاڑکانہ سندھ میں اناج کی مال بردار گاڑیوں کو ناجائز روکا گیا اور ڈی سی لاڑکانہ کے حکم سے اناج اور دالوں سے بھری گاڑیوں کو ناجائز طور پر حراست میں لیا گیا۔
گڈز ٹرانسپورٹ کے عہدیداروں کا کہنا ہے کہ حکومتی احکامات کے باوجود تمام نیشنل ہائی ویز گڈز ٹرانسپورٹرز کی گاڑیوں کو روکنے کا سلسلہ جاری ہے، گڈز ٹرانسپورٹرز کو کام سے نہ روکا جائے لیکن انتظامیہ اس کے برعکس ضلعی انتظامیہ ٹرانسپورٹرز کے لیے مسائل پیدا کر رہی ہے۔
ٹرانسپورٹرز نے مزید کہا کہ سندھ پولیس، پنجاب پولیس کا رویہ گڈز ٹرانسپورٹرز کے ساتھ انتہائی افسوسناک ہے۔۔گڈز ٹرانسپورٹرز کے مطابق غذائی اجناس اور اشیائے خوردو نوش کی ترسیل میں رکاوٹ سے شہروں میں غذائی بحران پیدا ہو جائے گا۔

April 3, 2020

کورونا وائرس: ورلڈ بینک کی پاکستان کے لیے 200 ملین ڈالر امدادکی منظوری

واشنگٹن:جدت ویب ڈیسک : ورلڈ بینک نے پاکستان کے لیے 200 ملین ڈالر کے پیکیج کی منظوری دیدی ہے۔ورلڈ بینک کے بورڈ آف ایگزیکٹو ڈائریکٹرز نے پاکستان کے لیے 200 ملین ڈالر کے پیکیج کی منظوری دیدی ہے جو کورونا وبا سے نمٹنے، صحت کے نظام کو تقویت دینے اور سماجی و اقتصادی مسائل کے حل پر استعمال کیا جائے گا، اس کے علاوہ ضروری طبی سامان کی فراہمی کے 8 جاری منصوبوں سے 38ملین ڈالر کی اضافی رقم بھی حاصل کی جائے گی۔کنٹری ڈائریکٹر ورلڈ بینک کا کہنا ہے کہ کورونا وائرس کے خلاف لڑنے کے لئے پاکستان کی مدد میں اضافہ کر رہے ہیں، پریپ منصوبہ کورونا کا پتہ لگانے اور نگرانی کرنے کی صلاحیت کو مستحکم کرنے میں مدد کرے گا جب کہ غریبوں کو نقد رقم کی منتقلی میں مدد کے لئے وسائل بھی فراہم کرے گا، اس کے علاوہ پریپ سرکاری اور نجی اسپتالوں میں وینٹیلیٹر اور پیرا میڈیکس کو ذاتی تحفظ کا سازو سامان بھی فراہم کرے گا۔

April 3, 2020

اسٹیٹ بینک کے اقدامات سے بینکوں پر منفی اثرات کم کرنے میں مدد ملے گی، موڈیز #SBP #Moody’

ویب ڈیسک :: موڈیز نے اسٹیٹ بینک آف پاکستان کے اقدامات پر کہا ہے کہ اس سے بینکوں پرکورونا وائرس کے منفی اثرات کو کم کرنے میں مدد ملے گی، پاکستان کی معاشی شرح نمو رواں سال دو سے دواعشاریہ پانچ فیصد تک رہنے کا امکان ہے۔
کوروناوائرس پر موڈیز نے اسٹیٹ بنک کےاقدامات کومثبت قرار دے دیا۔ کہا کہ یہ اقدامات بینکوں پر کوروناوائرس کے منفی اثرات کو کم کرنے میں مدد دیں گے۔ موڈیز نے بیان میں کہا کہ اسٹیٹ بینک نےشرح سود میں 1.5 فیصد کی کمی کی ہے۔
بینکوں کے کیپیٹل کنزرویشن بفر میں بھی ایک فیصد کی کمی کی ہے۔ ان اقدامات سے معاشی سست روی کے دوران بینکوں پر ہونے والے اثرات کم ہونگے۔
پاکستان کی معاشی شرح نمو رواں سال 2 سے 2.5 فیصد تک رہنے کا امکان ہے۔ ‏اس سے پہلے موڈی نے2.9فیصد شرح نمو رہنے کی پیش گوئی کی تھی۔
موڈیز نے کہا کہ خدمات کی کھپت پر نقل وحمل کی پابندیوں کے باعث کمی آئےگی۔
موڈیز نے مزید کہا کہ ‏ٹیکسٹائل سیکٹر کو سپلائی چین میں تعطل اور آڈرز کے مؤخر ہونے سے نقصان ہوگا۔ شرح سود میں کمی کریڈٹ گروتھ کو متوازن رکھنے کا باعث بنے گی

March 31, 2020

ورلڈ بینک نے ایشیائی ممالک کی معاشی شرح نمو میں غیر معمولی کمی کی پیشگوئی کر دی، مزید لاکھوں لوگوں کے غریب ہونے کا خدشہ

ویب ڈیسک :: عالمی وباء نے عالمی معیشت کو تباہی کے دہانے پر لاکھڑا کردیا، ورلڈ بینک نے ایشیائی ممالک کی معاشی شرح نمو میں غیر معمولی کمی کی پیشگوئی کر دی، مزید لاکھوں لوگوں کے غریب ہونے کا خدشہ پیدا ہو گیا۔

کورونا وائرس نے نہ صرف لاکھوں انسانی زندگیوں کو خطرے میں ڈال دیا ہے بلکہ عالمی معیشت کو بھی تباہی کے دہانے پر لا کھڑا کیا ہے، عالمی بینک نے ایشیائی ممالک کی معاشی شرح نمو میں غیر معمولی کمی اور مزید لاکھوں افراد کے غریب ہونے کا خدشہ ظاہر کر دیا۔

ورلڈ بینک کا کہنا ہے کہ کورونا وائرس نے پوری دنیا کو جس معاشی بحران سے دوچار کر رکھا ہے، وہ غیر معمولی حد تک غیر متوقع ہے۔ یہی وجہ ہے کہ معاشی تنزلی کی بالکل درست پیشگوئی کرنا انتہائی مشکل ہے۔

محتاط اندازے کے مطابق مشرقی ایشیائی اور پیسیفک ممالک میں اقتصادی ترقی 2.1 فیصد تک گر سکتی ہے،،اگر حالات مزید خراب ہوئے تو یہ شرح منفی 0.5 فیصد تک گرنے کا امکان ہے، یعنی ترقی رک جائے گی اور 0.5 فیصد کے حساب سے معاشی تنزلی شروع ہو جائے گی۔

چین میں اقتصادی ترقی 2.3 فیصد تک آجانے کی پیشگوئی کی جا رہی ہے، اور بدترین حالات میں یہ شرح 0.1 فیصد تک گر سکتی ہے۔

ورلڈ بینک کے مطابق عالمی وبا خطے میں مفلسی کو مزید ہوا دے گی۔ موجودہ حالات میں، مشرقی ایشیائی اور پیسیفک ممالک میں، خط غربت سے نیچے زندگی گزارنے والوں کی تعداد 2 کروڑ 40 لاکھ اور بدترین حالات میں ساڑھے تین کروڑ ہونے کا امکان ہے۔

ورلڈ بینک کی جانب سے تمام ممالک کو تجویز دی گئی ہے، کہ طبی آلات کی بروقت دستیابی کیلئے آپس میں تعاون یقینی بنائیں، نظام صحت میں زیادہ سے زیادہ پیسہ لگائیں، اور بیمارہونے والوں کی بھرپورمالی معاونت کریں تاکہ معاشی بحران کے اثرات کو کم کیا جا سکے۔

March 28, 2020

سونے نے تمام ریکارڈ توڑ دیے، 97000 روپے تولہ ہو گیا

لاہور:جدت ویب ڈیسک: سونے کی قیمت نے پچھلے تمام ریکارڈ توڑ دیے،سونے کی فی تولہ قیمت ملکی تاریخ کی بلند ترین سطح 97000 پر پہنچ گئی۔سونے کی بڑھتی ہوئی قیمتوں نے سونے کے خریدارواں کو حیرت میں مبتلا کردیا، رواں ہفتے کے چوتھے روز سونے کی قیمتوں میں ایک بار پھر اضافہ ریکارڈ کیاگیا،سونے کی قیمتوں میں 700 روپے کا مزید اضافہ ہوا۔خالص 24 قیراط فی تولہ سونا 98 ہزار روپے کا ہو گیا،22 قیراط فی تولہ سونا 89ہزار 833روپے کا ہو گیا،رواں کاروباری ہفتے کے دوران سونا 5200 روپے مہنگا ہوا،رواں کاروباری ہفتے میں عالمی مارکیٹ میں 41 ڈالر فی اونس سونا مہنگا ہوا۔واضح رہے کہ گزشتہ روز بھی سونے کی قیمتوں میں 2500 روپے کا اضافہ ہوا تھا جس سے خالص 24 قیراط فی تولہ سونا 95ہزار روپے کا ہوگیا اور 22 قراط فی تولہ سونا 87083 روپے کا ہوگیا اور 10 گرام چاندی 950 روپے کی ہوگئی۔سونے کی تیزی کے ساتھ بڑھتی ہوئی قیمتوں سے متوسط طبقہ بھی سونا خریدنے سے گریزاں ہے۔

March 27, 2020

انٹربینک مارکیٹ میں ڈالر 169 سے کم ہوکر 165 روپے کا ہوگیا۔

کراچی: امریکی ڈالر ملکی تاریخ کی بلند ترین سطح پر پہنچنے کے بعد اچانک نیچے آگیا، انٹربینک مارکیٹ میں ڈالر 169 سے کم ہوکر 165 روپے کا ہوگیا۔
تفصیلات کے مطابق کرنسی مارکیٹ روپے کی بے قدری اور ڈالر کی قیمت میں تیزی سے اتار چڑھاؤ کا سلسلہ جاری ہے ،ٹریڈنگ کے آغاز سے ڈالر کی قیمت میں اضافے کا رجحان دیکھا گیا اور کاروبار ہفتے کے اختتام پر امریکی ڈالر ملکی تاریخ کی بلند ترین سطح پر جا پہنچا۔
بینکوں کے درمیان لین دین میں ڈالر 2 روپے87 پیسہ مہنگاہوا ،جس کے باعث انٹر بینک میں ڈالر 166.13 سے بڑھ کر 169 روپے کا ہوگیا، گزشتہ 4 دن میں ڈالرکی قدرمیں 9 روپے 37 پیسے کا اضافہ ریکارڈ کیا گیا ہے۔
ڈالر 169 روپے پر پہنچا تو مرکزی بینک حرکت میں آگیا، زرائع کا کہنا تھا اسٹیٹ بینک نےمارکیٹ میں مداخلت کی اور ڈالر کی قیمت میں اضافہ روکنے کیلئے مارکیٹ میں 25 سے30کروڑڈالر فراہم کئے۔
جس کے بعد اچانک ڈالر کی قدر میں چارروپے کی کمی ہوئی اور ڈالر 169 سے کم ہوکر 165 روپے کاہوگیا۔

March 27, 2020

کے الیکڑک صارفین کیلئے بجلی کی قیمت بڑھانے کی منظوری

 

اسلام آباد: اقتصادی رابطہ کمیٹی کا اجلاس مشیر خزانہ حفیظ شیخ کی زیر صدارت اسلام آباد میں ہوا۔ اجلاس میں کورونا وائرس سے نمٹنے کیکلیے ایمرجنسی فنڈز کی سمری کی منظوری دی گئی۔ جس کے تحت این ڈی ایم اے کو 5 ارب روپے جاری کرنے اور الیکٹرک صارفین کیلیے بجلی کی قیمت 2 روپے 89 پیسے بڑھانے کی منظوری دے دی گئی۔

اقتصادی رابطہ کمیٹی نے اپنے اجلاس میں کے الیکٹرک کے لیے جولائی2016 سے مارچ 2019 تک ٹیرف ایڈجسٹمنٹ کی منظوری دی ہے جبکہ کے الیکٹرک کے لیے اس ٹیرف ایڈجسٹمنٹ کا نوٹیفکیشن 3ماہ بعد ہوگا۔کمیٹی نے کے الیکٹرک صارفین کیلیے بجلی ٹیرف میں سہ ماہی ایڈجسٹمنٹ ٹیرف کی منظوری دی۔ مختلف کیٹگریز کیلئے ٹیرف ایڈجسٹمنٹ ایک روپے 9 پیسے سے 2 روپے 89 پیسے کلو واٹ بڑھائی گئی۔

خیال رہے نیپرا نے جولائی 2016 سے مارچ 2019 تک کے الیکٹرک کو فیول ایڈجسٹمنٹ بجلی کے بلوں میں شامل کرنے کی منظوری دی تھی، سرچارج چار روپے اٹھاسی پیسے فی یونٹ کے حساب سے لگے گا، جس کے تحت کے الیکٹرک جولائی 2016 سیمارچ 2019 تک کے سابقہ بلوں میں فیول ایڈجسٹمنٹ سر چارج وصول کرے گی۔کمیٹی نے فاٹا میں نادرا منصوبہ کے لئے 5 لاکھ 32 ہزار ڈالر کے مساوی ضمنی گرانٹ، پائیدار ترقی کے اہداف کے پروگرام کیلئے ساڑھے 5 ارب روپے کی ضمنی گرانٹ ، وزارت ہاؤسنگ اینڈ ورکس کیلئے 27 کروڑ پچاس لاکھ روپے کی گرانٹ منظور کی۔

نیشنل الیکٹرک وہیکلز پالیسی کے مراعاتی پیکیج پر کمیٹی قائم کی گئی ہے جو ایک ماہ میں سفارشات دے گی، کمیٹی میں ڈپٹی چیئرمین پلاننگ کمیشن پٹرولیم حکام اور دیگر متعلقہ وزارتوں کے نمائندے شامل ہونگے۔ روپے کی قدرمیں کمی سے پاکستان اسٹیٹ آئل (پی ایس او) اور تیل کمپنیوں کو خسارے کے معاملہ پرمہلت مانگ لی گئی۔ ایل پی جی ایئر مکس کے منصوبوں پر بلوچستان حکومت سے مشاورت کی ہدایت کی گئی ہے۔