July 30, 2017

شریف خاندان پاکستانی قوم کے سامنے سرخرو ہوگا‘مریم نواز

مری /اسلام آباد جدت ویب ڈیسک سابق وزیر اعظم محمد نواز شریف کی صاحبزادی مریم نواز شریف نے کہاہے کہ عہدے اہمیت نہیں رکھتے نواز شریف عوام کے دلوں میں بستے ہیں ماضی نواز شریف کا تھا حال نواز شریف کا ہے اور مستقبل بھی نواز شریف کا ہوگا ۔ اتوار کو سابق وزیر اعظم محمدنواز شریف وزیر اعظم ہائوس سے مری میں اپنی رہائش گاہ پرمنتقل ہوگئے سابق وزیر اعظم مری پہنچے تو شہریوں نے ان کا شاندار استقبال کیا اور دیکھو دیکھو کون آیا شیر آیا شیر آیا میاں تیرے جانثار بے شمار بے شمار کے نعرے لگائے ۔نواز شریف کی صاحبزادی مریم نواز نے اپنے ٹوئٹ میں کہاکہ مری پہنچنے پر عوام پھر سے جمع ہوگئے انہوںنے کہاکہ محبتوں کا وہی سمندر انہوںنے کہاکہ عہدے اہمیت نہیںرکھتے نواز شریف عوام کے دلوں میں بستے ہیں ۔ قبل ازیں مری میں میڈیا سے بات چیت کرتے ہوئے مریم نواز نے کہاکہ شریف خاندان انشا اللہ پاکستانی قوم کے سامنے سرخرو ہوگا۔ مریم نواز نے کہاکہ جو کچھ ہورہا ہے وہ سب کے سامنے ہے، جو کچھ ہوگا آپ کے سامنے ہوگا۔انہوںنے کہاکہ پوری قوم ہمارے ساتھ کھڑی ہے ماضی نواز شریف کا تھا، حال نواز شریف کا ہے اور مستقبل بھی نواز شریف کا ہوگا اور اس کےلئے میڈیا ہماری آواز پورے ملک میں پہنچائے گا۔

July 30, 2017

شہرقائد میں پولیس کی کارروائیاں‘8افراد گرفتار

کراچی جدت ویب ڈیسک شہرقائد کے مختلف علاقوں میں پولیس نے کارروائیوں کے دوران تین خواتین سمیت 8افراد کوگرفتار کرلیا۔تفصیلات کے مطابق کراچی کے علاقے اجمیرنگری میں پولیس نے کارروائی کے دوران قتل کی واردات میں ملوث تین خواتین کو گرفتار کرلیا۔پولیس کا کہنا ہےکہ ملزمہ نسرین نے گھروالوں کے ساتھ مل کر نوجوان کو قتل کیا تھا۔پولیس حکام کا کہنا ہےکہ مقتول عمران چند روزپہلے ہی جیل سےرہا ہوکرآیا تھا،قتل میں ملوث مزید دوملزمان انور اور کامران مفرور ہیں۔دوسری جانب عزیزآباد قبرستان کے قریب شہریوں کو لوٹنے والے تین ڈاکوئوں پرعوام نے دھاوا بول دیا ،جن میں سے ایک پکڑا گیا،دو بھاگ گئے ،شہریوں نے ہاتھ لگے ڈاکوکی اچھی طرح پٹائی کر کے اسے پولیس کے حوالے کردیا۔ادھر کراچی کے علاقے لیاقت آباد بندھانی کالونی میں رینجرز اور پولیس نے سرچ آپریشن کےدوران چھ افراد کوحراست میں لے لیا ۔ملزمان کےقبضے سے دو پستول اور دیگر سامان برآمد ہوا ہے۔واضح رہے کہ دو روز قبل رینجرز نے کراچی کے علاقے گڈاپ سٹی سے سات افراد پر مشتمل گروہ کو حراست میں لے کر بھاری مقدار میں بارودی اسلحہ برآمد کیا تھا۔

July 30, 2017

نواز شریف کے ایجنڈے کو آگے لیکر چلیں گے‘شاہد خاقان عباسی

اسلام آباد جدت ویب ڈیسک مسلم لیگ ن کے نامزد وزیراعظم شاہد خاقان عباسی نے سپریم کورٹ کے فیصلے پر ردعمل دیتے ہوئے کہا ہے کہ اسے نہ عوام نے قبول کیا اور نہ ہی تاریخ اسے قبول کرےگی  وہ محمد نواز شریف ہی کے ایجنڈے کو آگے لیکر چلیں گے ۔اتوار کو مسلم لیگ ن کے نامزد وزیر اعظم شاہد خاقان عباسی نے جے یو آئی ف کے سربراہ مولانافضل الرحمن سے ملاقات کی جس میں موجودہ صورتحال سمیت نئے وزیر اعظم کے انتخاب کے حوالے سے تبادلہ خیال کیا گیا ۔ملاقات کے بعد میڈیا سے بات چیت کرتے ہوئے نامزد وزیر اعظم شاہد خاقان عباسی نے کہاکہ سپریم کورٹ کے فیصلے پر من و عن عمل کردیا ہے۔شاہد خاقان عباسی نے کہا کہ ن لیگ نے انہیں امیدوار نامزد کیا ہے اور وہ محمد نواز شریف ہی کے ایجنڈے کو آگے لیکر چلیں گے۔انہوں نے کہا کہ وہ کسی رنفرنس سے نہیں ڈرتے، جو چاہے ان کے خلاف ریفرنس دائر کرلے۔ایک سوال پر شاہد خاقان عباسی نے کہاکہ چوہدری نثار علی خان پارٹی کے اہم رکن ہیں   تھے اور رہیں گے ۔ ایک سوال پر انہوںنے کہاکہ عوام مجھے عرصے سے منتخب کرتے چلے آرہے ہیں الزام لگا والے اپنے گریبان میں جھانکیں ۔انہوں نے کہا کہ مولانا فضل الرحمان ہماری حمایت کررہے ہیں اور دیگر جماعتوں سے رابطے میں ان کی پارٹی کی مدد کریں گے۔اس موقع پر مولانا فضل الرحمان نے کہا کہ شاہد خاقان عباسی ہمارے پرانے ساتھی ہیں اور مسلم لیگ ن نے ان کو امیدوار نامزد کیا ہے۔انہوںنے کہاکہ ان کی پارٹی نے کسی فرد کا نہیں بلکہ ملک کا ساتھ دیا ہے۔

July 30, 2017

پاک چین افواج خصوصی بندھن میں بندھی ہیں‘ جنرل قمر جاوید باجوہ

اسلام آباد جدت ویب ڈیسک پاک فوج کے سربراہ جنرل قمرجاوید باجوہ نے چینی فوج کوان کی90ویں سالگرہ پر مبارک دی ہے ۔پاک فوج کے ترجمان میجر جنرل آصف غفور کے مطابق پاک فوج جنرل قمر جاوید باجوہ نے چائنہ کے پیپلز لبریشن آرمی کو ان کی 90ویں سالگرہ پر مبارکباد دیتے ہوئے کہاکہ پاکستان اور چین کی افواج کے درمیان خصوصی بندھن قائم ہیں ۔ پاک فوج کے ترجمان کے مطابق چین کے اخبار روزنامہ گوانگ منگ کو جاری خصوصی پیغام میں آرمی چیف نے کہا کہ پاکستان دونوں ممالک کی افواج کے درمیان مضبوط پیشہ وارانہ تعلقات اور تعاون کا حامی ہے ۔دریں اثنائ سینٹ میں دفاعی کمیٹی کے سربراہ مشاہد حسین سید نے چینی فوج کی 90ویں سالگرہ پر ایک بیان میں کہاکہ پیپلز لبریشن آرمی دنیا کی سب سے عمدہ او ر پیشہ وارانہ فوج ہے ۔انہوںنے کہاکہ چینی فوج ایشیائ میں امن سکیورٹی اور سلامتی کےلئے کام کرنے کے علاوہ اقوام متحدہ کی امن فوج میں بھی کر دارادا کررہی ہے ۔انہوںنے کہاکہ چینی فوج کو دیگر ممالک میں امن کا کر دار ملنے کے بعد ان کا مزید مثبت کر دار سامنے آئےگا ۔انہوںنے یاد دلایا کہ 2015ئ میں یمن میں بحران پیدا ہونے کے بعد چینی فوج نے شہریوں کو نکالنے میں اہم کر دارادا کیا تھا ۔مشاہد حسین سید نے کہاکہ صدر شی جن پنگ کی قیادت میں چینی فوج نے دہشتگردی کے خلاف اہم کر دارادا کیا ہے ۔انہوںنے یاد دلایا کہ چین اور پاکستان کے درمیان مساوی تعلقات کی بنیاد پر چین نے اس سال 23مارچ کو پریڈ کےلئے چینی فوج کا دستہ بھیج دیا تھا ۔انہوںنے کہاکہ پاکستان چین اور چینی افواج کی اپنے ملک کے خلاف جارحیت قلع قمع کر نے کےلئے ان کی حمایت کریگا۔

July 30, 2017

نواز شریف کے جانے سے جمہوریت کو کوئی خطرہ نہیں‘بلاول بھٹو

لاڑکانہ جدت ویب ڈیسک چیئرمین بلاول بھٹو زرداری نے کہا ہے کہ پاکستان پیپلز پارٹی احتساب پر یقین رکھتی ہے نواز شریف کے خلاف فیصلے سے جمہوریت اور پارلیمنٹ کو کوئی خطرہ نہیں ہے۔ حکومت سندھ صحت کی سہولیات فراہم کرنے کیلئے انقلابی اقدامات اٹھا رہی ہے میں وزیر اعلی پنجاب سمیت تینوں صوبوں کے وزیر اعلی کو چیلنج کرتا ہوں کہ ایسا ادارہ اپنے صوبوں میں بنا کر دکھائیں ۔ ان خیالات کا اظہار انہوں نے اتوا رکو لاڑکانہ میں این آئی سی وی ڈی سینٹر کے افتتاحی تقریب کے موقع پر شرکا سے خطاب کرتے ہوئے کیا۔ بلاول بھٹو نے کہا کہ لاڑکانہ کی عوام نے پی پی پی کیلئے لاتعداد قربانیاں دیں ہمیں بھرپور عزت دی جن کا ہم پر قرض ہے شہید ذوالفقار علی بھٹو نے 1973 میں چانڈکا میڈیکل کالج کی بنیاد رکھی جس وقت یہ سہولیات صرف ملک کے بڑے بڑے شہروں میں موجود تھیں پی پی پی حکومت ان کے مشن کو آگے اسپتالوں وکو اپ گریٹ کرنے کے ساتھ صحت کی بنیادی سہولیات صوبے کے کونے کونے میں فرائم کر رہی انہوں نے کہا کہ سندھ حکومت بہتر نتائج دے رہی ہے اور ان پر اعتماد کے باعث ہی ایسے ادارے بن رہے ہیں ان کا کہنا تھا کہ شہید محترمہ نے اپنے دور اقتدار میں لیڈی ہیلتھ ورکرز بھرتی کرکے صوبے کے گھر گھر تک صحت کی سہولیات فراہم کیں تھیں انہوں نے کہا کہ این آئی سی وی ڈی ایک اچھا ادارہ ہے جو بہتر کام کرتا ہے جو قریبی اضلاع کے لوگوں کو بھی سہولیات مفت فراہم کرے گا نئی عمارت کی تعمیر کے کارڈیالوجی سرجری بھی شروع کی جائے گی۔ تقریب سے خطاب کرتے ہوئے وزیر اعلی سندھ مراد علی شاہ نے کہا کہ 18ویں ترمیم کے بعد 2011 میں این آئی سی وی ڈی وفاق سے صوبے کے حوالے اور رواں سال ہم نے اس کا بجٹ چار ارب روپے بڑھا کے 5.8 ارب روپے کردیا ہے کراچی کے بعد رواں سال لاڑکانہ سکھر،ٹنڈو محمد خان اور سکھر میں یہی سینٹرز قائم کئے جارہے ہیں جبکہ اگلے سال میرپورخاص خیرپور اور بوابشاہ میں یہ مراکز قائم ہوں گے انہوں نے مزید کہا کہ جہاں ہم خود کو کمزور محسوس کرتے ہیں وہیں پرائیوٹ سیکٹر اور نجی اسپتالوں کے ساتھ مل عوام کو صحت کی مطلوبہ سہولیات فراہم کر رہے ہیں سندھ میں پی پی پی 1970 سے عوام کی حمایت یافتہ ہے ہم آصف زرداری اور بلاول بھٹو کی سرپرستی میں عوام کی خدمت کر رہے ہیں دیگر سیاستدان صف باتیں اور ہم کام کرتے ہیں جس کی مثال ایسی اداروں کا قیام ہے اس موقع پر نثار کھوڑو ڈاکٹر سکندر میندرو و دیگر بھی موجود تھے۔

July 30, 2017

نواز شریف کی نا اہلی کا فیصلہ میرٹ پر ہوا‘ پرویز مشرف

اسلام آباد جدت ویب ڈیسک آل پاکستان مسلم لیگ کے سربراہ اور سابق صدر جنرل پرویز مشرف نے کہا ہے کہ نواز شریف نا اہلی کا سپریم کورٹ کا فیصلہ میرٹ اور عوام کی خواہشات کے عین مطابق کیا گیا ہے، نواز شریف نے پاکستانی عوام سے جھوٹ بولا، کوئی بھی قانون سے بالاتر نہیں ہوتا۔بھارتی ٹی وی سے گفتگو میں پرویز مشرف کا کہنا تھا کہ فیصلے پر سپریم کورٹ کو تنقید کا نشانہ بنانے کی کوئی وجہ نہیں، فیصلہ میرٹ پر ہوا فوج کا کوئی کردار نہیں۔امریکا کی جانب سے پاکستان کی امداد روکے جانے پر پرویز مشرف کا کہنا تھا کہ امداد رک جانے سے پاکستان کو کوئی فرق نہیں پڑتا۔سابق صدر نے کہا کہ امریکی صدر ٹرمپ جنوبی ایشیا اور پاکستان کے حالات سے پوری طرح آگاہ نہیں، انہیں خطے کی صورتحال سمجھنے کی ضرورت ہے۔پرویز مشرف نے کہا کہ کشمیر میں لوگ آزادی کی جنگ لڑ رہے ہیں، مقبوضہ کشمیر میں بھارت جو کر رہا ہے اس پر بھارت کو شرم آنی چاہیے۔

July 30, 2017

حسن ابدال میں المناک ٹریفک حادثہ‘16افراد لقمہ اجل

حسن ابدال جدت ویب ڈیسک جی ٹی روڈ پر مسافر وین اور ٹرک میں تصادم کے بعد خوفناک آتشزدگی کے نتیجے میں 16افراد جاں بحق اور تین شدید زخمی ہو گئے ، 10افراد نے موقع پر ہی تڑپ تڑپ کر جان دیدی جبکہ 6افراد کو ہسپتال منتقل کیا گیا جہاں پر وہ زخموں کی تاب لاتے ہوئے جاں بحق ہو گئے،گیس پائپ لائن سے ٹکرانے سے وین میں آگ لگ گئی ، مسافروں کو وین سے باہر نکلنے کا موقع بھی نہ مل سکا ۔تفصیلات کے مطابق حسن ابدال میں جی ٹی روڈ پرکیڈٹ کالج کے قریب راولپنڈی سے پشاورجانے والے ٹرک اورمسافر وین میں تصادم ہوگیا جس کے بعد دونوں گاڑیوں میں خوفناک آگ بھڑک اٹھی جس کے نتیجے میں وین میں سوار10 افراد موقع پر ہی جاں بحق جبکہ متعدد زخمی ہوگئے جنہیں فوری طبی امداد کے لیے قریبی اسپتال منتقل کردیا گیا جہاں مزید 6 افراد جان کی بازی ہارگئے۔ریسکیو ذرائع کے مطابق دونوں گاڑیوں میں تصادم کے بعد آگ لگی، جس کے بعد قریب موجود گیس پائپ لائن میں آگ بھڑک اٹھی، جس کے بعد کسی مسافر کو اترنے کا موقع نہ مل سکا تاہم فوری اطلاع ملنے پرفائربریگیڈ کا عملہ جائے حادثہ پرپہنچ گیا جس سے آگ پرقابو پالیا۔ دوسری جانب ڈی پی او عبد الرشید نے جائے حادثے کے قریبی علاقے کو مزید کسی حادثے سے بچنے کیلیے خالی کرا لیا ہے۔انہوں نے بتایاکہ گیس پائپ لائن کے باعث مسافر وین آگ کی لپیٹ میں آئی جس سے زیادہ ہلاکتیں ہوئیں،مسافروں کو نکلنے کا موقع بھی نہ ملا اور وہ لقمہ اجل بن گئے ۔امدادی ٹیموں کے ایک اہلکار نے بتایا کہ تمام لاشیں ناقابل شناخت ہیں اور انہیں مزید کارروائی کے لیے حسن ابدال کے ڈسٹرکٹ ہیڈکوارٹر ہسپتال منتقل کیا گیا۔خیال رہے کہ گذشتہ ماہ جون میں صوبہ پنجاب کے جنوبی علاقے احمد پور شرقیہ میں نیشنل ہائی وے پر آئل ٹینکر کے الٹنے کی وجہ سے ہونے والی آتشزدگی کے نتیجے میں 157 افراد جھلس کر ہلاک جبکہ 100 سے زائد افراد زخمی ہوگئے تھے، بعد ازاں یہ ہلاکتیں 210 سے تجاوز کرگئیں تھیں۔وزیر اعلی پنجاب نے حسن ابدال ٹریفک حادثے میں قیمتی جانوں کے ضیاع پر دکھ اور افسوس کا اظہار کیا ہے اور واقعے کی رپورٹ طلب کی ہے ۔