May 29, 2020

جنوبی پنجاب میں ٹڈی دل نے فصلیں اور سبزیاں برباد کر دیں، کاشتکار پریشان

ملتان:جدت ویب ڈیسک :ملتان سمیت جنوبی پنجاب میں ٹڈی دل نے فصلیں اور سبزیاں برباد کر دیں، محکمہ زراعت نے ہیلپ لائن بنا کر جان چھڑا لی۔ کسانوں کے رابطے پر کسی نے فون تک نہ اٹھایا۔جنوبی پنجاب میں 78 لاکھ ایکڑ رقبے پر مختلف فصلیں کاشت کی گئی ہیں جن میں کپاس، کماد، چارہ جات اور سبزیاں بھی شامل ہیں لیکن گزشتہ کئی روز سے فصلوں پر ٹدی دل کا حملہ مزید شدید ہو گیا ہے جس کیلئے محکمہ زراعت کے اقدمات صرف زبانی جمع خرچ ہیں جس کی وجہ سے فصلوں کو نقصان پہنچنے پر کاشتکار بھی پریشان ہیں۔ محکمہ زراعت کے حکام کا کہنا ہے کہ موجودہ صورتحال میں ٹڈی دل کو کنٹرول کرنے کیلیے مختلف محکموں کی ٹیمیں کاوشیں کر رہی ہیں تاہم مثالی کاشتکاروں کا وٹس ایپ گروپ بنا کر ہیلپ لائن نمبر جاری کر دیا ہے جس پر کال کی صورت میں کاشتکاروں کی مدد کر رہے ہیں۔ ہیلپ لائن نمبر پر کال موصول نہیں کی جارہی جس کی وجہ سے صرف خانہ پوری کیلئے مختص نمبر سے کاشتکاروں کے مسائل برقرار ہیں جن کو کم کرنے کیلئے کاشتکار اپنی مدد آپکے تحت ہی کھیتوں سے ٹڈی دل کو بھگانے میں مصروف ہیں۔

May 29, 2020

.پاکستانی نژاد خاتون برطانیہ کی پہلی باحجاب ڈپٹی ڈسٹرکٹ جج تعینات

کراچی جدت ویب ڈیسک ::پاکستانی نژاد برطانوی خاتون رفیعہ ارشد برطانیہ کی پہلی باحجاب ڈپٹی ڈسٹرکٹ جج بن گئیں۔ رپورٹ کے مطابق 40 سالہ رفیعہ ارشد کو وکالت کے 17 سالہ کیریئر کے بعد گزشتہ ہفتے مڈلینڈز میں ڈپٹی ڈسٹرکٹ جج تعینات کیا گیا۔
اس حوالے سے مسلم کونسل آف بریٹین سے جاری بیان کے مطابق رفیعہ ارشد مغربی ملک میں باحجاب جج بننے والی خاتون ہیں اور دنیا کی چند خاتون مسلمان ججز میں سے ایک ہیں۔
انہوں نے ویسٹ نیویارک شائر میں گرامر اسکول سے تعلیم حاصل کی اور وہ اپنے خاندان میں سے یونیورسٹی جانے والی پہلی خاتون ہیں۔ رفیعہ ارشد نے اسلامک فیملی لا کے عنوان سے ایک کتاب بھی لکھی ہے۔
ان کا کہنا تھا کہ یہ نہ صرف خواتین بلکہ مسلمان خواتین کی کامیابی بھی ہے، اگر کبھی کھڑے ہونے اور اپنی پیشہ وارانہ خواہشات کو پورا کرنے کا وقت آتا تو وہ وقت اب آگیا ہے۔
بیان میں کہا گیا کہ رفیعہ ارشد شادی شدہ ہیں اور ان کی 3 بچے ہیں۔علاوہ ازیں برطانوی نشریاتی ادارے ‘بی بی سی’کی رپورٹ کے مطابق انہوں نے کہا کہ میں اسے صرف ذاتی کامیابی کے طور پر نہیں دیکھتی یہ اس سے کہیں زیادہ ہے۔
رفیعہ ارشد نے کہا کہ عدالتی دفتر اور تعیناتی کمیشن اپنی زیادہ سے زیادہ کوشش کررہے ہیں لیکن عدلیہ ابھی بھی اتنی مختلف نہیں ہے۔
سینٹ میری چیمبرز کے مشترکہ سربراہان نے کہا کہ انہوں نے قانون میں مسلمان خواتین کی کامیابی کی قیادت کی ہے۔ وکی ہوجز اور جیوڈی کلاکزٹن سینٹ میری چیمبرز کے مشترکہ سربراہان نے کہا کہ وہ اس تقرر سے بہت خوش ہیں جو مکمل طور پر میرٹ پر مبنی ہے اور رفیعہ ارشد اس کی مستحق تھیں۔

Rafia Arshad is the First Hijab-Wearing Muslim Judge in UK ...

May 29, 2020

پاکستان کی بابری مسجد کے مقام پر مندر کی تعمیر کے آغاز کی مذمت

اسلام آباد جدت ویب ڈیسک :پاکستان نے بھارت میں بابری مسجد کے مقام پر مندر کی تعمیر کے آغاز کی شدید مذمت کرتے ہوئے کہا ہے کہ دنیا کورونا وبا کا مقابلہ کررہی ہے اور بھارت ہندتوا ایجنڈے پرعمل پیرا ہے۔ترجمان دفتر خارجہ نے اپنے بیان میں کہا کہ 26 مئی کو بابری مسجد کی جگہ پر مندر کی تعمیر کے آغاز کی پاکستانی حکومت اور عوام سخت مذمت کرتے ہیں۔ترجمان نے کہا کہ مندر کی تعمیر 9 نومبر 2019 کے بھارتی سپریم کورٹ کے فیصلے کے سلسلے کی کڑی ہے، بھارتی سپریم کورٹ کا فیصلہ انصاف کے تقاضے پورے کرنے میں ناکام رہا، بھارتی اقلیتوں کو مذہبی آزادی نہ ملنا بھارتی سیکولرازم کے جھوٹے دعوے کو بے نقاب کرتا ہے۔خیال رہے کہ 9 نومبر 2019 کو بھارتی سپریم کورٹ نے بابری مسجد کیس کا فیصلہ سناتے ہوئے مسجد کی زمین ہندوؤں کے حوالے کرتے ہوئے مرکزی حکومت کو مندر تعمیر کرنے کا حکم دیا تھا۔بھارتی سپریم کورٹ کے چیف جسٹس رانجن گنگوئی کی سربراہی میں 5 رکنی بینچ نے بابری مسجد کیس کا فیصلہ سنایا، پانچ رکنی بنچ میں مسلمان جج ایس عبدالنذیر بھی شامل تھے۔ یاد رہے کہ1528ء میں مغل دور حکومت میں بھارت کے موجودہ شہر ایودھیا میں بابری مسجد تعمیر کی گئی جس کے حوالے سے ہندو دعویٰ کرتے ہیں کہ اس مقام پر رام کا جنم ہوا تھا اور یہاں مسجد سے قبل مندر تھا۔برصغیر کی تقسیم تک معاملہ یوں ہی رہا، اس دوران بابری مسجد کے مسئلے پر ہندو مسلم تنازعات ہوتے رہے اور تاج برطانیہ نے مسئلے کے حل کیلئے مسجد کے اندرونی حصے کو مسلمانوں اور بیرونی حصے کو ہندوؤں کے حوالے کرتے ہوئے معاملے کو دبا دیا۔1992 میں ہندو انتہا پسند پورے بھارت سے ایودھیا میں جمع ہوئے اور ہزاروں سیکیورٹی اہلکاروں کی موجودگی میں 6 دسمبر کو سولہویں صدی کی یادگار بابری مسجد کو شہید کر دیا۔حکومت نے مسلم ہندو فسادات کے باعث مسجد کو متنازع جگہ قرار دیتے ہوئے دروازوں کو تالے لگا دیے، جس کے بعد معاملے کے حل کیلئے کئی مذاکراتی دور ہوئے اور معاملہ سپریم کورٹ پہنچا جس نے اب مسجد کی زمین ہندوؤں کے حوالے کردی ہے۔

May 29, 2020

آسٹریلیا میں ہونے والا ٹی 20 ورلڈ کپ انعقاد سے قبل تنازع کی زد میں آ گیا ایونٹ ایک سال کے لیے ملتوی

دبئی ۔جدت ویب ڈیسک ::: ٹی 20 ورلڈ کپ ہوگا یا نہیں؟ آئی سی سی فیصلہ نہ کرسکا۔اور اب آسٹریلیا میں ہونے والا ٹی 20 ورلڈ کپ انعقاد سے قبل تنازع کی زد میں آ گیا، کرکٹ آسٹریلیا نے آئی سی سی سے ایونٹ ایک سال کے لیے ملتوی کرنے کی درخواست کر دی ہے۔
تفصیلات کے مطابق انٹرنیشنل کرکٹ کونسل نے ٹیلی کانفرنس میں ٹی ٹوینٹی ورلڈ کپ کے انعقاد کا فیصلہ 10 جون تک مؤخر کر دیا ہے، کرکٹ آسٹریلیا نے درخواست کی تھی کہ میگا ایونٹ ایک سال آگے بڑھایا جائے۔
تاہم کرکٹ آسٹریلیا کا آئی سی سی فنانشل کمیٹی کو لکھا جانے والا یہ خط میڈیا پر لیک ہو گیا ہے، بورڈ ممبران نے خفیہ معلومات باہر نکلنے پر تحفطات ظاہر کیے اور اس کی تحقیقات کرانے کا اعلان کیا ہے۔
آسٹریلین میڈیا کے مطابق کرکٹ آسٹریلیا نے آئی سی سی کو میگا ایونٹ ایک سال آگے بڑھانے کی درخواست کی ہے، دوسری طرف کرکٹ آسٹریلیا کے چئیرمین ارل ایڈینگز کا کہنا ہے کہ ورلڈ کپ 2022 تک ملتوی ہونا کرکٹ کے لیے نقصان دہ ہوگا۔
واضح رہے کہ کرونا وائرس کی عالمگیر وبا نے دنیا بھر میں کھیلوں کو متاثر کیا ہے، اس دوران کرکٹ کے متعدد مقابلے مؤخر یا ملتوی کیے جا چکے ہیں، کو وِڈ 19 کے باعث نومبر میں کھیلے جانے والے ٹی 20 کرکٹ ورلڈ کپ کے متاثر ہونے کا بھی خطرہ ہے جس کے لیے آئی سی سی نے اپنا لائحہ عمل تیار کر لیا ہے۔
آئی سی سی کی جانب سے کہا گیا تھا کہ انٹرنیشنل کرکٹ بورڈ آیندہ ماہ ٹی 20 ورلڈ کپ کے بارے میں دوبارہ غور کرے گی، اور اکتوبر، نومبر میں شیڈول ٹی 20 ورلڈ کپ کی تیاریاں جاری رہیں گی۔

India tour of Australia 2020-21 schedule, venues confirmed: T20I ...

May 29, 2020

محکمہ ریلوے کا31 مئی کے بعد بھی ایڈوانس بکنگ جاری رکھنے کا فیصلہ

کراچی جدت ویب ڈیسک ::: محکمہ ریلوے نے 31 مئی کے بعد بھی ایڈوانس بکنگ جاری رکھنے کا فیصلہ کیا ہے، ایڈوانس بکنگ جاری رکھنے کے سلسلے میں نوٹیفیکیشن بھی جاری کر دیا گیا۔ محکمہ ریلوے نے 31 مئی کے بعد بھی ٹرینوں میں ایڈوانس بکنگ جاری رکھنے کا نوٹیفیکیشن جاری کر دیا، لاک ڈاؤن کے دوران چلائی جانے والی 15 ٹرینوں کی ایڈاوانس بکنگ اکتیس مئی کے بعد بھی جاری رکھی جائے گی۔محکمہ ریلوے کا کہنا ہے کہ ٹرینوں کی ٹکٹوں کے بکنگ آفسز صبح 8 سے رات 8 بجے تک کھلے رہیں گے، کراچی میں سٹی ریلوے اسٹیشن، حیدر آباد، روہڑی اور سکھر بکنگ آفس کھلا رہے گا۔
ٹرینیں چلانے سے متعلق فیصلہ
ریلوے کے تمام ڈویژنل سپرنٹنڈنٹ کو ہدایت جاری کر دی گئی ہے کہ اگلے احکامات تک ایڈاونس بکنگ جاری رکھی جائے۔گزشتہ ماہ شیخ رشید نے کہا تھا کہ موجودہ حالات میں ریلوے کا 5 ارب روپے مہینے کا نقصان ہو رہا ہے، جس سے ملک میں سفید پوش طبقہ سب سے زیادہ متاثر ہو رہا ہے۔
یاد رہے کہ چند دن قبل ایک پریس کانفرنس میں وزیر ریلوے شیخ رشید نے بتایا تھا کہ ٹرینوں کی بکنگ کی مد میں 23.2 کروڑ روپے ایڈوانس جمع ہیں۔

May 29, 2020

یو این چارٹر کے تحت عالمی امن کے لیے پاکستان کام جاری رکھے گا: آرمی چیف

راولپنڈی۔ جدت ویب  ڈیسک ::: آرمی چیف جنرل قمر جاوید باجوہ نے یو این امن مشنز کے عالمی دن کے موقع پر بیان میں کہا ہے کہ پاکستان اقوام متحدہ کے چارٹر کے تحت عالمی امن کے لیے کام جاری رکھے گا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے کہا ہے کہ آج کے دن پاکستان اپنی بہادر امن فورسز کی قربانیوں کے جذبےکی یاد مناتا ہے۔
آرمی چیف نے پیغام میں کہا کہ امن کے پیامبر دنیا میں انسانیت کی خدمت میں مصروف ہیں، پاکستان بھی یو این چارٹر کے تحت عالمی امن کے لیے کام جاری رکھےگا۔
واضح رہے کہ پاکستان سمیت دنیا بھر میں آج یو این امن مشن کا عالمی دن منایا جا رہا ہے، رواں برس اس دن کا موضوع وومن پیس کیپنگ رکھا گیا ہے۔
پاکستان نے 30 ستمبر 1947 کو اقوام متحدہ میں شمولیت اختیار کی تھی، جب کہ امن مشن کے لیے پاکستان کی معاونت کا آغاز 1960 میں ہوا، 60 سال میں پاکستان 26 ممالک میں 46 امن مشنز میں حصہ لے چکا ہے۔دنیا میں امن کے لیے پاک فوج کی خدمات بلاشبہ ناقابل تسخیر ہیں جس کا اعتراف اقوام متحدہ کی جانب سے کئی بار کیا گیا ہے۔پاک فوج کی خواتین بھی کسی سے پیچھے نہیں رہیں، عالمی امن کے لیے پاک فوج کے افسران اور متعدد جوان اپنی جانوں کا نذرانہ پیش کر چکے ہیں۔۔ اپنے گھر بار چھوڑ کر پاک فوج کے دستے ہزاروں میل دور دوسرے ملکوں میں امن کے لیے خدمات انجام دے رہے ہیں۔