July 3, 2020

کراچی میں مون سون کی پہلی بارش 6 جولائی کو ہونے کا امکان

کراچی: جدت ویب ڈیسک ::محکمہ موسمیات نے شہرقائد میں بارشوں کے حوالے سے پیشگوئی کردی۔ شہر میں اگلے ہفتے سے مون سون بارشوں کا آغاز ہوگا اور معمول سے زائد بارشیں متوقع ہیں۔
تفصیلات کے مطابق کراچی میں مون سون بارشوں کی پیش گوئی کردی گئی ہے، ڈائریکٹرمیٹ میٹ نے کہا ہے اگلے ہفتے سے شہر میں مون سون بارشیں متوقع ہے، 6جولائی کی شام یا رات کو درمیانی درجے کی بارشیں ہوسکتی ہیں۔
ڈائریکٹر میٹ کا کہنا ہے کہ رواں سال کراچی میں معمول سے 10فیصد زائد بارشیں متوقع ہیں، بارشوں سے گرمی کی شدت میں کمی ہونے کا امکان ہے، معمول سے زائد بارشوں کے باعث سیلابی صورت حال کا بھی خدشہ ہے.جبکہ شہریوں نے خدشہ ظاہر کیا ہے کہ مون سون کے باعث کراچی میں مزید لوڈشیڈنگ ہوگی، اس طرح بارش کی خوشیاں کے الیکٹرک برباد کردے گا، حکومت کا چاہیے کہ لوڈشیڈنگ کے معاملے پر غور کرے۔۔ادھر شہر میں گرمی اور اوپر سے غیراعلانیہ لوڈشیڈنگ نے شہریوں کی زندگی اجیرن کردی ہے۔

July 2, 2020

آرمی چیف جنرل قمر جاوید باجوہ کا کور ہیڈ کوارٹر کراچی اور رینجرز ہیڈ کوارٹر کا دورہ ، کور کمانڈر کراچی لیفٹیننٹ جنرل ہمایوں عزیز نے جنرل قمر جاوید باجوہ کو بریفنگ دی۔

راولپنڈی:ویب ڈیسک :: آرمی چیف جنرل قمر جاوید باجوہ نے کراچی کا دورہ کیا اور قانون نافذ کرنے والے اداروں کی کارکردگی پر اطمینان کا اظہار کیا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف نے کور ہیڈ کوارٹر کراچی اور رینجرز ہیڈ کوارٹر کا دورہ کیا، کور کمانڈر کراچی لیفٹیننٹ جنرل ہمایوں عزیز نے جنرل قمر جاوید باجوہ کو بریفنگ دی۔

آئی ایس پی آر کے مطابق آرمی چیف نے قانون نافذ کرنے والے اداروں کی کارکردگی پر اطمینان کا اظہار کیا۔

آرمی چیف نے گریژن ہیلتھ سینٹر، فیلڈ آئسولیشن سینٹر کا بھی دورہ کیا، پاک فوج کے سپہ سالار نے کرونا سے بچاؤ کے لیے کراچی کور کی کوششوں کی تعریف کی۔

جنرل قمر جاوید باجوہ نے رینجرز ہیڈ کوارٹر آمد پر یادگار شہدا پر پھول چڑھائے اور فاتحہ خوانی کی۔

واضح رہے کہ اس سے قبل آرمی چیف جنرل قمر جاوید باجوہ نے پاکستان اسٹاک ایکسچینج میں شہید ہونے والے اہلکاروں اور سیکیورٹی گارڈز کو خراج عقیدت پیش کیا تھا، ان کا کہنا تھا کہ اپنی بہادر قوم کے تعاون سے دہشت گردوں کی ہر کوشش ناکام بنادیں گے۔

پاک فوج کے سربراہ کا کہنا تھا کہ سیکورٹی گارڈز نے اپنی جانیں قربانیں کر کے دہشت گردوں کو روکا، گارڈز کی بروقت کارروائی سے دہشت گردی کی بڑی کوشش ناکام بنا دی گئی۔

July 2, 2020

کے الیکڑک کے صارفین کی جیب پر ڈاکہ

کراچی جدت ویب ڈیسک :: کراچی والے تیار ہوجائیں،کے الیکڑک نے بجلی مہنگی کرنے کی تیاری کرلی ڈھائی سے تین روپے تک فی یونٹ اضافہ متوقع ہے کل ای سی سی کے اجلاس میں منظوری دی جائے گی

مشیر خزانہ عبدالحفیظ شیخ کی زیر صدارت اقتصادی رابطہ کمیٹی کے اجلاس میں کے الیکٹرک صارفین کیلئے بجلی ٹیرف میں 2 روپے 89 پیسے تک اضافے کی منظوری دے دی۔تفصیلات کے مطابق مشیر خزانہ عبدالحفیظ شیخ کی زیر صدارت اقتصادی رابطہ کمیٹی کا اجلاس ہوگا، ای سی سی 4 نکاتی ایجنڈے پر غور کیا گیا۔ای سی سی نے کےالیکٹرک صارفین کیلئے بجلی مہنگی کرنےکی منظوری دے دی ، کےالیکٹرک ٹیرف میں اضافہ سہ ماہی ایڈجسٹمنٹ کی مد میں کیا جائے  گا، صارفین کیلئے بجلی ٹیرف میں 2 روپے 89 پیسے تک اضافے کی منظوری دی گئی۔،اجلاس میں احساس پروگرام کے تحت37لاکھ مستحقین کیلئے29ارب 72 کروڑ روپے امداد کی بھی منظوری دی گئی، مستحقین کو12ہزار روپے فی کس امداد فراہم کی جائے گی ، رواں مالی سال احساس پروگرام کیلئے 200 ارب روپے مختص کئے گئے ہیں۔اعلامیے میں کہا گیا تخفیف غربت ڈویژن نے31لاکھ نئےمستحقین کوامداد کی سفارش کی تھی جبکہ گھریلو صارفین کو 74 ارب روپے مالیت کی درامدی ایل این جی کی فراہمی پر غور کیا گیا ، سوئی ناردرن نےبتایا91فیصدگھریلوصارفین121روپےماہانہ بل اداکرتےہیں۔ای سی سی نے اوگرا کو  معاملہ کو حل تلاش کرنے کی ہدایت کر دی اور کہا گیس شعبے  میں گردشی قرض روکنے کیلئے معاملے  پر پالیسی سازی ہوگی۔اجلاس میں موسم ربیع کی یوریا کھادضروریات کیلئےایل این جی پر 96کروڑروپے سبسڈی کی منظوری دیتے ہوئے کہا گیا فروری یوریا کے 2 لاکھ فاضل ذخائر کیلئے 2 بند یوریا پلانٹس کوایل این جی پرچلایا جائے گا۔اعلامیے میں کہا گیا ایگریٹیک، فاطمہ فرٹیلائزرزکو جولائی ،ستمبر میں کم قیمت پر ایل این جی دی جائے گی جبکہ نیشنل ٹیلی کمیونیکیشن کمپنی کیلئے4 ارب 59 کروڑ روپے کے بجٹ کی منظوری بھی دے دی گئی۔یاد رہے 22 جون کو ہونے والے اجلاس میں گندم اور آٹے کی قیمتوں میں کمی سے متعلق اقدامات کی منظوری اور قیمتوں پر کنٹرول کیلئے نجی شعبہ کو گندم کی درآمد کی اجازت دیدی گئی تھی۔اعلامیے میں کہا گیا تھا کہ نجی شعبے کیلئے گندم کی درآمد کیلئے کوئی حد نہیں ہوگی، صوبائی حکومتوں کو فوری گندم کی ریلیز کی پالیسی کے اعلان کا کہا جائے گا۔اجلاس کے دوران سی ڈی اے کو میٹرو کی ادائیگیوں کی مد میں ڈھائی ارب کی سپلیمنٹری گرانٹ کی منظوری دی گئی اور شہدا کے اہل خانہ کو ادائیگی کیلئے 20 کروڑ کی گرانٹ کی سمری کی بھی منظوری دی۔اعلامیے کے  مطابق اسلام آباد پولیس کے شہدا کے اہلخانہ کو  3.6 کروڑ کی فراہمی اور  اسلام آبادپولیس کے 10.5کروڑ  کے  واجبات کی ادائیگی کی سمری منظور کی گئی تھی۔

July 1, 2020

قبضے ختم کرانے کیلئے سپریم کورٹ کے احکامات پر من و عن عمل کیا جائیگا، کمشنر کراچی

کراچی :جدت ویب ڈیسک : گٹر باغیچہ پر سپریم کورٹ آف پاکستان کے احکامات پر اب تک پارک بنانے کا عمل شروع نہ ہوسکا، کمشنر کراچی اور محکمہ انسداد تجاوزات کے ایم سی گٹر باغیچہ کی کئی ایکڑ اراضی پر ناجائز قبضہ ختم کرانے میں ناکام ہوگئے۔ سیاسی سرپرستی میں ماضی کے حکمرانوں نے یہاں قبضوں پر ایکشن لینے کے بجائے قبضوں کو فروغ دیا، سرکاری افسران قبضہ واگزار کرانے میں اپنے عہدوں کے چھن جانے کے خوف میں کارروائی نہیں کرتے۔ سپریم کورٹ آف پاکستان نے جب اپنے احکامات پر باز پرس کی تو ضلعی انتظامیہ کی دوڑیں لگ گئیں ،کمشنر کراچی کو سپریم کورٹ کے احکامات یاد آگئے،متعلقہ اداروں سمیت گٹر باغیچہ پہنچ گئے،متعلقہ افسران سے تفصیلی گفتگو کی اور کہا کہ گٹر باغیچہ کے حوالہ سے سپریم کورٹ کے احکامات پر من و عن عمل کیا جائے گا۔ کمشنر کراچی کا کہنا ہے کہ گڑ باغیچہ کی حیثیت کو بدلنے کی اجازت دی جائے گی نہ یہاں رہائشی اسکیم بنے گی اورنہ بس اڈہ تعمیر ہوگا۔متعلقہ افسران سپریم کورٹ کے احکامات پر عمل کریں اور سپریم کورٹ کے احکامات کی روشنی میں گڑ باغیچہ کی جگہ پارک تعمیر کرنے کے لئے اقدامات کریں ۔اس موقع پر ایڈیشنل ڈپٹی کمشنر غربی حشام مظہر قریشی اورسینئرڈائریکٹرانکروچمنٹ بشیر صدیقی بھی موجود تھے۔ کمشنر نے واضح طور پر ہدایت کی کہ گٹر باغیچہ کی جگہ پر عوام کی تفریح کے لئے پارک بنایا جائے گا ۔ انھوں نے ایڈیشنل ڈپٹی کمشنر حشام مظہر قریشی کو ہدایت کی کہ وہ گٹر باغیچہ کی نگرانی کریں اور یقینی بنائیں کہ اس جگہ کوئی تجاوزات قائم نہ ہو۔ واضح رہے کہ کمشنر کراچی کی اس گفتگو کو شہریوں نے محض خانہ پوری قرار دیتے ہوئے کہا ہے کہ کمشنر سنجیدہ ہوتے تو پہلے سے قبضہ کی گئی سیکڑوں ایکڑ سے قبضہ واگزار کرانے کی حکمت عملی طے کرتے۔

July 1, 2020

پاکستان اسٹاک ایکسچینج۔حملے کی تحقیقات میں انکشاف۔ تانے بانے افغانستان سے ملنے لگے

کراچی : جدت ویب ڈیسک :: پاکستان اسٹاک ایکسچینج پر حملے کی تحقیقات میں انکشاف ہوا ہے کہ ان کے تانے بانے افغانستان سے ملتے ہیں، اور دہشت گردوں کو قندھار سے ہدایات دی جارہی تھیِں۔
تفصیلات کے مطابق پاکستان اسٹاک ایکسچینج پر ہونے والے دہشت گرد حملے کی تحقیقات میں اہم پیشرفت ہوئی ہے، دہشت گردوں کے قبضے سے ملنے والے موبائل فون کا ریکارڈ تحقیقاتی اداروں نےحاصل کرلیا۔
اس حوالے سے تفتیشی حکام کا کہنا ہے کہ ابتادئی تحقیقات میں یہ بات سامنے آئی ہے کہ دہشت گردوں کے تانے بانے افغانستان تک جا پہنچے ہیں، دہشت گردوں کو سہولت کاری اور ہدایات دینے والا افغانستان کے شہرقندھار سے تعلق رکھتا ہے۔؎
تفتیشی حکام کے مطابق دہشت گردوں سے ملنے والے موبائل فون سے افغانستان کی کال ٹریس ہوگئی ہے، مزید کالز کاریکارڈ حاصل کیا جارہا ہے۔
پاکستان اسٹاک ایکسچینج پر دہشت گرد حملے کے بعد دہشت گردوں کی جانب سے خریدی گئی کار کے شو روم پر سیکیورٹی اداروں نے چھاپہ مارا ہے، چھاپے کے دوران شو روم کے مالک سے تفصیلی پوچھ گچھ کی گئی۔
ذرائع کے مطابق حملے میں استعمال ہونے والی گاڑی سے متعلق شواہد تحویل میں لے لیے گئے ہیں، شوروم کے مالک نے گاڑی کی ملکیتی دستاویزات اداروں کے حوالے کیں۔

Karachi Stock Exchange attacked in Pakistan; Balochistan Liberation Army claims responsibility, South Asia News | wionews.com