جدت ویب ڈیسک ::آل صرافہ ایسوسی ایشن کے مطابق اس کمی کے بعد فی تولہ قیمت 68 ہزار800 روپے ہوگئی ہے جبکہ دس گرام سونےکی قیمت 857 روپےکمی کےبعد 58 ہزار 985 روپے ہوگئی ہے۔
گزشتہ روز بھی سونےکی فی تولہ قیمت میں دوسوروپےکی کمی ریکارڈ کی گئی تھی۔آل صرافہ ایسوسی ایشن کے مطابق 200 روپے کی کمی کے بعد سونے فی تولہ قیمت 69 ہزار800 روپے ہوگئی تھی جبکہ دس گرام سونے کی قیمت 172 روپے کمی کے بعد 59 ہزار842 روپے ہوگئی تھی۔اس سے قبل سونے کی فی تولہ قیمت میں اضافہ ہوا تھا جس کے بعد سونے کی قیمت 70 ہزارسے زائد ہوگئی تھی۔تفصیلات کے مطابق انٹرنیشنل مارکیٹ میں ٹریڈنگ کے دوران سونے کی قیمت میں 06 ڈالر کی کمی ریکارڈ ہوئی جس کے بعد سونے کی قیمت 1278 سے کم ہو کر1272 فی اونس تک پہنچ گئیں۔ جیولرز ایسوسی ایشن کے چیئرمین محمد ارشد کے مطابق عالمی مارکیٹ میں کمی کے بعد مقامی صرافہ بازاروں میں قیمتوں میں نمایاں کمی ریکارڈ ہوئی۔

نیویارک جدت ویب ڈیسک : ایرانی تیل پرپابندیوں کے باعث عالمی منڈی میں خام تیل کی قیمت میں نصف فیصد کا اضافہ ریکارڈ کیا گیا۔برینٹ خام تیل کی قیمت چوہتر ڈالر پچاس سینٹس اور امریکی خام تیل کی قیمت پنسٹھ ڈالر پچانوے سینٹس فی بیرل ہوگئی۔تفصیلات کے مطابق عالمی منڈی میں خام تیل کی قیمت میں اضافے کا دیکھنے میں آیا ، برینٹ خام تیل کی قیمت میں نصف فیصد کا اضافہ ہوا اور برینٹ کی قیمت74ڈالر 50سینٹس فی بیرل ہوگئی ۔اسی طرح امریکی خام تیل کی قیمت65 ڈالر95 سینٹس فی بیرل ہوگئی ، امریکی خام تیل کی قیمت میں بھی نصف فیصد کا اضافہ ریکارڈ کیاگیا ہے۔خام تیل کی قیمت میں اضافہ ایرانی خام تیل پرامریکی پابندیوں میں اضافہ ہے، امریکا نے ایران کو دیاگیا استثنی ختم کردیا، اطلاق2مئی سے ہوگا۔امریکی کی جانب سےجاری بیان کےمطابق ایران پرپابندیاں عائد کی گئیں تھیں تاہم چند ممالک کوایران سے خام تیل کی خریداری کی اجازت دی گئی تھی، ان ممالک میں چین، بھارت، جنوبی کوریا، جاپان اور ترکی شامل ہیں۔چین نے امریکی فیصلے کو ماننے سےانکارکردیا ہے، ایران کی خام تیل کی پیداوار دس لاکھ بیرل یومیہ ہے جس میں سے نصف چین کو جاتا ہے۔یاد رہے رواں ماہ کے شروع میں عالمی منڈی میں خام تیل کی قیمت 5 ماہ کی بلند ترین سطح پر پہنچی گئی تھی ، امریکی خام تیل کی قیمت 63 ڈالر 48 سینٹس فی بیرل اور برینٹ خام تیل کی قیمت 70 ڈالر 62 سینٹس فی بیرل ہوگئی تھی۔واضح رہے گزشتہ برس اکتوبر میں عالمی منڈی میں خام تیل کی قیمت 4 سال کی بلند ترین سطح پر پہنچ گئی تھی اور خام تیل کی قیمت 85 ڈالر فی بیرل کے قریب جا پہنچی تھی۔بعد ازاں ایک ماہ بعد دسمبر میں خام تیل کی قیمت سال کی کم ترین سطح پر آگئی تھی اور عالمی منڈی میں چوبیس گھنٹوں میں خام تیل ساڑھے تین ڈالر فی بیرل سستا ہوگیا تھا۔

واشنگٹن جدت ویب ڈیسک :امریکی صدرڈونلڈ ٹرمپ نے کہا ہے کہ سعودی عرب اور تیل پیداکرنےوالے ممالک کی تنظیم’اوپیک’ کے دوسرے رکن ممالک ایرانی تیل کی کمی پوری کرنے پوری صلاحیت رکھتے ہیں۔ ان کا کہنا ہے کہ اوپیک کےرکن ممالک عالمی منڈی میں ایرانی تیل کا “مکمل متبادل” ہوسکتےہیں۔امریکی حکومت کی طرف سے یہ بیان ایک ایسے وقت میں سامنے آیا ہے جب دوسری جانب امریکی صدر ڈونلڈ ٹرمپ نے واضح کیا ہےکہ ایران پرعاید کی جانے والی اقتصادی پابندیوں میں کسی قسم کی نرمی نہیںکی جائے گی۔ ان کا کہنا ہےکہ جن ممالک کو عارضی طورپرایران سے تیل خرید کرنے کی اجازت دی گئی تھی انہیں 2 مئی کے 2019 کے بعد مزید مہلت نہیں دی جائے گی۔ٹویٹر پر ایک ٹویٹ میں امریکی صدر نے کہا کہ سعودی عرب اور اوپیک میں موجود دوسرے ممالک ایرانی تیل پر پابندیوں کے بعد عالمی منڈی میں تیل کی کمی پوری کرسکتے ہیں۔ واشنگٹن نے کہا ہے کہ وہ ایران سے بعض ممالک کو تیل خرید کرنےکی ددی گئی مہلت میں مزیدتوسیع نہیں کرے گا۔ امریکی حکام کا کہناہے کہ ایرانی تیل کی درآمدات پر پابندیاں ایران پر عاید کی جانے والی اقتصادی پابندیوں کا حصہ ہیں۔ ایرانی تیل پر پابندیوں کے نفاذ کے بعد ایرانی تیل کی مرکزی آمدن ختم ہوجائے گی۔ادھر عالمی منڈی میں خاتم تیل کی قیمت میں تین اعشاریہ تین فیصد اضافہ ہوا جس کے بعد تیل کی قیمت 74.31 ڈالر فی بیرل ہوگئی ہے۔ گذشتہ برس نومبرکے بعد تیل کی سب سے زیادہ قیمت ہے۔ اس سے قبل تیل کی قیمت 73.63 فی بیرل تک پہنچی تھی۔

جدت ویب ڈیسک ) ڈاکٹرعبدالحفیظ شیخ نے اسد عمر کی ایمنسٹی اسکیم سےاختلاف کرتے ہوئے ایف بی آر کو نیا مسودہ تیار کرنے کی ہدایت کردی۔
اثاثہ جات کی ڈیکلیئریشن سے متعلق مستعفی وزیر خزانہ اسد عمر کی ایمنسٹی اسکیم عبدالحفیظ شیخ کو قبول نہیں ، وزیراعظم عمران خان کے مشیر برائے خزانہ ڈاکٹر عبدالحفیظ شیخ نے شرائط وضوابط اور ٹیکس ریٹس اور سلیبز سے اتفاق نہیں کیا۔ ایف بی آر کو اسکیم میں تبدیلی کی ہدایت کردی۔وزارت خزانہ کے حکام نے بتایا کہ بےنامی اثاثوں کو ظاہر کرنے پر ٹیکس ریٹ میں کمی اور بیرون ملک سے اثاثے واپس لانے کی شرط میں نرمی کا امکان ہے جبکہ غیرملکی اثاثوں اوررقم سے پاکستان بناؤ سرٹیفکیٹ اورغیرملکی کرنسی بانڈ خریدنے کی اجازت ہوگی۔حکام نے بتایا کہ ایمنسٹی اسکیم کیرٹ اینڈ اسٹک پالیسی کے تحت اسکیم نافذ ہوگی اور اس کے باعث روزگارمیں اضافہ اورغربت میں کمی ہوگی۔ایف بی آر کی جانب سے اگر ترمیمی مسودہ تیار کرلیا تو سمری منگل کو وفاقی کابینہ کے اجلاس میں منظوری کیلئے پیش کی جائے گی۔
حکومت نے ملک میں معاشی سرگرمیاں محدود ہونے کا بھی ادراک کرلیا۔ ذرائع کا کہنا ہے کہ ٹیکس ریٹس اور سلیبز پر نظرثانی کا کام شروع ہوچکا۔

اسلام آباد جدت ویب ڈیسک :حکومت نے آئی ایم ایف سے ملک میں وفاق اور صوبائی آمدن کو بڑھانے کے لیے سنگل ویلیو ایڈڈ ٹیکس (وی اے ٹی) کے نفاذ پر رضامندی کا اظہار کردیا۔ حکومتی دستاویزات سے واضح ہوتا ہے کہ پاکستان کو آمدن بڑھانے کے لیے اضافی کوششیں کرنی ہوں گی جو ملکی مجموعی پیداوار (جی ڈی پی) کے 2.6 فیصد تک ہوگا۔آئی ایم ایف پروگرام کے تحت تین سالہ اصلاحاتی عمل کے دوران وفاقی سطح پر ٹیکسز میں 2.3 فیصد تک اضافہ کیا جائے گا جو مجموعی طور پر 10 کھرب 80 ارب روپے تک ہوگا۔ان ٹیکسز کو لاگو کرنے کا عمل آئندہ مالی سال 20-2019 سے کردیا جائے گا جس میں 1.1 فیصد اضافہ کیا جائے گا، اس کے بعد مالی سال 20-2021 میں 0.9 فیصد جبکہ 21-2022 میں 0.3 فیصد اضافہ کیا جائے گا۔اس کے ساتھ ساتھ صوبائی سطح پر ٹیکسز کو بھی 0.1 فیصد سالانہ بنیادوں پر بڑھایا جائے گا تاکہ مالی سال 21-2022 میں 1.6 فیصد تک ٹیکس سے جی ڈی پی کے تناسب کو حاصل کیا جاسکے جو رواں مالی سال کے دوران 1.3 فیصد ہے۔مذکورہ پیشرفت سے متعلق دستاویزات کے مطابق وسیع پیمانے پر ٹیکس اقدامات سے مختلف اہداف حاصل کرنے کی امید لگائی گئی تھی، جس میں انکم ٹیکس، سیلز ٹیکس اور فیڈرل ایکسائز ڈیوٹی پر اضافی ٹیکس کریڈٹ اور استثنی کو ختم کرکے ٹیکس اخراجات میں واضح کمی کرنا شامل ہے جبکہ اس کے ساتھ سنگل ایڈڈ ویلیو ٹیکس (وی اے ٹی) کے نفاذ سے خصوصی طریقہ کار کو دور کیا جائے گا جبکہ شرح ٹیکس کو کم کیا جائے گا۔اس حوالے سے حکام کا کہنا ہے کہ ان وسط مدتی مالیاتی تخمینے آئی ایم ایف پروگرام کے تحت سالانہ بنیادوں پر کلیدی اقدامات کے ممکنہ نتائج پر سامنے آئے ہیں۔اگر حکومت پاکستان اورعالمی مالیاتی ادارہ معاہدے کے بعد پہلے مالی سال کے دوران جی ڈی پی کو 1.1 فیصد تک بڑھانے پر رضامندی کا اظہار کرتے ہیں تو اس سے 0.4 فیصد تک جی ڈی پی کا ایک بڑا حصہ متاثر ہوگا جو تقریبا 175 ارب روپے تک ہوسکتا ہے۔تاہم اس پر قابو پانے کے لیے وی اے ٹی کا نفاذ ضروری ہوگا جو 0.3 فیصد کی بحالی میں معاون ثابت ہوگا جبکہ دیگر فرق ٹیکس میں دی جانے والی چھوٹ کے خاتمے سے پورا کیا جائے گا۔اس حوالے سے فیڈرل بورڈ آف ریونیو کے حکام کا کہنا تھا کہ حکومت کی جانب سے دیگر پالیسی اور اصلاحاتی اقدامات میں بیکنگ سیکٹر پر لگائے جانے والے ود ہولڈنگ ٹیکس کی کمی شامل ہے جس کی وجہ سے بینکنگ سیکٹر پر منفی اثرات مرتب ہورہے ہیں اور یہ آمدن پر بھی اثرانداز ہورہے ہیں۔

جدت ویب ڈیسک ) کراچی کی مقامی عدالت نے ایف بی آر کی درخواست پر 20 بینک اکاؤنٹس منجمد کردیے ، جن میں باپ، بیٹے اور 2 بیٹیوں کے 11 اکاؤنٹس بھی شامل ہیں ۔
منی لانڈرنگ ، نامی اکاؤنٹس اور ڈالر بیرون مُلک بھیجنے کے معاملے میں کراچی کی مقامی عدالت نے ایف بی آر کی درخواست پر 20 بینک اکاؤنٹس 30 دن کیلئے منجمد کرنے کا حکم دے دیا ۔
کراچی کی ایک فیملی کیخلاف 4 لاکھ 94 ہزار 500 ڈالر امریکہ منتقلی کا مقدمہ درج ہے، ملزمان نے منی لانڈرنگ کیلئے 2016 میں 11 بینک اکاؤنٹس کھولے تھے ۔
منجمد کیے گئے اکاؤنٹس میں 8 ارب سے زائد کی ٹرانزیکشن والے 8 بے نامی اکاؤنٹس بھی شامل ہیں ، 4 تاجروں پر 5 سال میں ایک ارب 26 کروڑروپے ٹیکس چوری کرنے کا الزام ہے ۔
منجمد اکاؤنٹس میں بھٹوکالونی کے رہائشی ابراہیم کا اکاؤنٹ بھی شامل ہیں جس میں یکم جولائی 2015 سے 30 جون 2018 تک 36 کروڑ 94 لاکھ سے زائد رقم جمع کرائی گئی ۔

جدت ویب ڈیسک ::عرب ریاستوں کی جانب سے پیٹرول کی قیمت میں اضافے کے بعد سعودی عرب نے بھی پیٹرول کے نرخ بڑھا دیے ۔
سعودی عرب کی سرکاری پیٹرولیم کمپنی آرامکوکےمطابق مملکت میں بینزین91 پیٹرول کی قیمت ایک روپیہ 40پیسے کےاضافے کےساتھ 54.30جبکہ بینزین 95قیمت 2.10 کے اضافے کے ساتھ 79.17روپےہوگئی ہے۔
رواں سال کی دوسری سہ ماہی کےلیےڈیزل کی قیمت17.71روپے،مٹی کےتیل کی قیمت 24.12روپےجبکہ ایل پی جی کی قیمت 28.27روپےفی لیٹرمقررکی گئی ہے۔

جدت ویب ڈیسک ::پاکستان انٹرنیشنل ایئرلائن (پی آئی اے) کے باکمال ملازمین نے ایک لاجواب کارنامہ سرانجام دیا ہے، ویزہ منسوخ ہونے کے باوجود فلائٹ اسٹیورڈ لندن پہنچ گیا جسے برطانوی امیگریشن حکام نے حراست میں لے لیا ہے۔موصول اطلاعات کے مطابق اسلام آباد سے پی کے 701 پر جعل سازی کر کے جنرل ڈیکلریشن پر مانچسٹر پہنچنے والےفلائٹ اسٹیورڈ عمران محسود کو برطانوی امیگریشن نے حراست میں لے لیا۔بتایا گیا ہے کہ فضائی میزبان برطانیہ کے ویزے کے حصول کی منسوخی پر جنرل ڈیکلیریشن ہر ڈیوٹی نہیں کر سکتا، پی آئی اے کے فلائٹ اسٹیورڈ عمران محسود نے یوکے کے ویزہ کی درخواست دی تھی جو منظور نہیں ہوئی جبکہ انتظامیہ بھی غافل رہی اور یوکے امیگریشن نے معمول کے چیک پر ملازم کو گرفتار کر لیا۔
دوسری جانب پی آئی اے پر جرمانہ عائد کئے جانے کی بھی اطلاعات ہیں۔اس ضمن میں بات کرتے ہوئے ترجمان پی آئی اے نے کہا کہ بغیر ویزہ مانچسٹر کی پرواز پر ڈیوٹی کیسے کی مکمل انکوائری کی جائے گی۔
ترجمان پی آئی اے کے مطابق فلائٹ اسٹیورڈ عمران محسود کو پہلی دستیاب پرواز پی کے 702 پر واپس لایا جا رہا ہے ۔۔واضح رہے کہ کچھ روز قبل قومی ایئر لائن کی لاہور سے تعلق رکھنے والی فضائی میزبان بھی دوران ڈیوٹی پیرس میں غائب ہو گئی تھی