راولپنڈی: جدت ویب ڈیسک :شمالی وزیرستان میں سیکیورٹی فورسز کے آپریشن کے 2 دہشت گرد ہلاک جب کہ ایک کو گرفتار کرلیا گیاہے۔آئی ایس پی آر کے مطابق شمالی وزیرستان کے علاقے نرگوسا میں سیکیورٹی فورسز نے دہشتگردوں کی موجودگی کی اطلاعات پر آپریشن کیا۔ جھڑپ کے دوران 2 دہشت گرد ہلاک جب کہ ایک دہشت گرد زخمی ہواجس کو گرفتار کرلیا گیا۔ ہلاک ہونے والے دہشتگردوں کی شناخت عثمان علی اور وحید لشتئی کے نام سے ہوئی ہے، مارے گئے دہشت گرد تحریک طالبان سجنا گروپ کے سرگرم رکن اور آئی ای ڈیز بنانیکے ماہر تھے۔ واضح رہے کہ شمالی وزیرستان میں ایک مرتبہ پھر دہشتگردوں کی کارروائیاں بڑھتی جارہی ہے۔ اتوار اور پیر کی درمیانی شب میرانشاہ دتہ خیل روڈ پر گاں احمد خیل بابری اڈہ کے قریب زیر تعمیر پولیس چیک پوسٹ کو نامعلوم افراد نے بارودی مواد سے اڑا دیا۔

لاہور: جدت ویب ڈیسک :فردوس عاشق اعوان نے کہا ہے کہ اپوزیشن کو ہر بار عبرتناک رسوائی کا سامنا کرنا پڑا، پی ڈی ایم کی کشتی بیچ منجدھار غرق ہو چکی، راجکماری، شہزادے اور مولانا کے چہرے شرمسار اور دل داغدار ہیں۔ وزیراعلی پنجاب کی معاون خصوصی برائے اطلاعات ڈاکٹر فردوس عاشق اعوان نے اپنے بیان میں کہا کہ پی ڈی ایم کی ہر شاخ پر الو بیٹھا ہے، یہ الو اسی شاخ کو کاٹ رہے ہیں جس پر وہ بیٹھے ہیں، ناکام احتجاج کے بعد منافقین کے اس ٹولے کو منہ چھپانے کی جگہ نہیں مل رہی۔ انہوں نے کہا کہ قوم نے اس چور ٹولے کی منفی سیاست کو ملیا میٹ کر دیا، عوام نے گمراہ کرنے والے ڈاکوں کا شر انگیز بیانیہ دفن کر دیا ہے۔فردوس عاشق اعوان کا کہنا تھا کہ وزیراعظم عمران خان کے ہوتے ہوئے کوئی بھی کرپٹ احتساب سے نہیں بچ سکتا، پی ڈی ایم کو کورونا وبا کے دوران اجتماعات کرتے ہوئے شرم آنی چاہیے، لوگ کورونا سے مر رہے ہیں اور یہ ٹولہ اپنی منفی سیاست کے لئے کورونا پھیلا رہا ہے۔

اسلام آباد: جدت ویب ڈیسک :مریم نواز نے کہا ہے کہ پی ڈی ایم کی تحریک کو سست سمجھنے والے ناکام ہونگے، بلاول پی ڈی ایم سٹیئرنگ کمیٹی کے ممبر نہیں، اس لیے نہیں آئے، مولانا کی خصوصی دعوت پر اجلاس میں شرکت کی۔ ادھر پاکستان ڈیمو کریٹ موومنٹ کی اسٹیئرنگ کمیٹی کا اجلاس مولانا فضل الرحمان کے زیر صدارت جاری ہے۔ جس میں مریم نواز، شاہد خاقان عباسی، راجہ پرویز اشرف و دیگر شریک ہیں۔ اجلاس میں اے این پی سے ذاہد خان، قومی وطن پارٹی سے سکندر شیر پا، ہاشم بابر، بی این پی مینگل سے جہانزیب جمالدینی، آغا حسن بلوچ، جے یو ائی سے مولانا عبدالغفور حیدری، اکرم خان درانی شریک ہیں۔ نیشنل پارٹی سے میر کبیر، مرکزی جماعت اہلحدیث سے شفیق پسروری، پی کے میپ سے عثمان کاکڑ اجلاس میں موجود ہیں۔اسٹیئرنگ کمیٹی اجلاس میں 19 جنوری کو الیکشن کمیشن کے سامنے ہونے والے مظاہرہ کو حتمی شکل دی جائے گی، لانگ مارچ پر بھی تفصیلی مشاورت ہوگی۔ فروری میں ہونے والے مظاہروں کو اسٹیئرنگ کمیٹی میں حتمی شکل دی جائے گی۔ اسمبلیوں سے استعفوں کا معاملہ اسٹیئرنگ کمیٹی اجلاس میں زیر بحث ہوگا۔

اسلام آباد: جدت ویب ڈیسک :شہزاد اکبر نے کہا ہے کہ براڈ شیٹ سے متعلق دستاویز پبلک کر رہے ہیں، احتساب شفافیت کے بغیر ہو نہیں سکتا، دسمبر 2000 میں نواز شریف مشرف سے ڈیل کر کے باہر چلے گئے، این آر او کا خمیازہ پاکستان کو جرمانے کی صورت میں بھگتنا پڑا، ماضی کی غلطیوں کے نتائج بھگت رہے ہیں۔مشیر احتساب و داخلہ شہزاد اکبر نے پریس کانفرنس کرتے ہوئے کہا کہ براڈ شیٹ کے معاملے پر وزیراعظم نے کچھ ہدایات دی، براڈ شیٹ سے متعلق دستاویز پبلک کرنے کیلئے وکلا نے رابطہ کیا، براڈ شیٹ کی طرف سے ای میل موصول ہوئی، وزیراعظم کی ہدایت پر براڈ شیٹ کی دستاویز پبلک کر رہے ہیں، شفافیت کے بغیر احتساب کا عمل ممکن نہیں۔شہزاد اکبر کا کہنا تھا کہ نیب اور براڈ شیٹ کے درمیان معاہدہ جون 2000 میں ہوا، دسمبر 2000 میں مشرف اور نواز شریف میں معاہدہ ہوا اور وہ باہر گئے، نیب نے 2003 میں براڈ شیٹ سے معاہدہ منسوخ کیا، 20 مئی 2008 میں براڈ شیٹ کیساتھ سیٹلمنٹ، 1.5 ملین ڈالرز کی ادائیگی ہوئی، جولائی 2019 میں ہائیکورٹ میں اپیل کی تھی اس کا فیصلہ براڈ شیٹ کے حق میں آیا۔

اسلام آباد: جدت ویب ڈیسک :مودی سرکار کی سازش ایک بار پھر بے نقاب ہوگئی، یعنی گھر کو آگ لگ گئی گھر کے چراغ سے، بی جے پی حکومت اور میڈیا کا گٹھ جوڑ سامنے آگیا۔وزیر خارجہ شاہ محمود قریشی نے اپنے بیان میں کہا ہے کہ انتخابات سے پہلے بی جے پی سرکار کو 5 ریاستوں میں شکست ہوئی، بھارت نے جب پلوامہ کا ناٹک رچایا تو ہم نے مسترد کیا، یکم اگست کو بھارت نے مقبوضہ کشمیر میں 2 لاکھ فوج بھجوائی، فوج بھیجنے کا مقصد 5 اگست کے اقدامات کیخلاف اٹھنے والی آواز کو دبانا تھا۔گزشتہ روز ترجمان دفتر خارجہ کی جانب سے جاری بیان میں کہا گیا کہ پاکستان نے عالمی برادری کو دہشتگردی میں بھارتی سرپرستی کے ثبوت دیئے، ارنب گوسوامی سے متعلق انکشافات پاکستانی موقف کی تصدیق کرتے ہیں، عالمی برادری کو پاکستان کے خلاف دہشت گردی میں بھارت کی ریاستی سرپرستی اور عالمی سطح پر پاکستان مخالف مہم کے ناقابل تردید ثبوت پیش کئے۔زاہد حفیظ چودھری کا کہنا تھا کہ تازہ ترین انکشافات اس بات کی مزید تصدیق کرتے ہیں کہ پاکستان نے مستقل طور پر کیا اشارہ کیا ہے۔ ہم نے شروع میں ہی پاکستان کے خلاف بھارت کے بدنیتی پر مبنی پروپیگنڈے کو مسترد کر دیا تھا۔ انہوں نے کہا کہ فروری 2019 میں پلوامہ حملے کا سب سے زیادہ فائدہ بی جے پی کی حکومت کو تھا۔ پاکستان، ہندوستان کے جھوٹوں کا مقابلہ حق کے ساتھ ہی کرتا رہیگا اور بھارت کی اشتعال انگیزیوں کے مقابلہ میں مضبوطی اور ذمہ داری کے ساتھ کام کرے گا۔

کراچی: جدت ویب ڈیسک :ملک بھر میں کورونا کی دوسری لہر کے سبب 26 نومبر سے بند تعلیمی اداروں میں تدریسی عمل کا مرحلہ وار بحالی کا عمل شروع ہوگیا ہے جس کے تحت نویں سے بارہویں جماعت کے لیے تدریسی عمل شروع ہوگیا ہے۔ وزرائے تعلیم کانفرنس میں کئے گئے فیصلوں کی روشنی میں ملک بھر میں تقریبا 2 ماہ تک تعلیمی ادارے بند رہنے کے بعد نویں سے بارہویں جماعت تک تعلیمی سلسلہ آج سے بحال ہو گیا۔ تعلیمی اداروں میں کورونا ایس او پیز پر عمل درآمد لازمی قرار دیا گیا ہے جس پر سختی سے عمل کروایا جا رہا ہے۔ طلبہ کو سماجی فاصلہ رکھنے کی ہدایت کی گئی ہے۔ دوسرے مرحلے میں پہلی سے آٹھویں کلاسز کے طلبہ یکم فروری کو اسکول جائیں گے جبکہ یونیورسٹیز بھی یکم فروری سے کھولی جائیں گی۔ واضح رہے کہ کورونا کی دوسری لہر کو مدنظر رکھتے ہوئے وفاقی وزیر تعلیم شفقت محمود کی سربراہی میں وزرائے تعلیم کانفرنس میں کئے گئے فیصلوں کی رو سے 26 نومبر سے 24 دسمبر اور پھر 11 سے18 جنوری تک آن لائن کلاسوں کے ذریعے تعلیم دی جاری رہی تھی جب کہ 25 دسمبر سے 10 جنوری تک موسم سرما کی تعطیلات دی گئی تھیں۔

جامشورو: جدت ویب ڈیسک :خیرپور کے علاقے پیر جو گوٹھ میں زیادتی کے بعد قتل کی جانے والی 7 سالہ معصوم بچی مونیکا لاڑک زیادتی و قتل کیس کو حل کرلیا گیا۔لیاقت میڈیکل یونیورسٹی اسپتال ( لمس) کی فارنزک و مولیکیولر بیالوجیکل لیبارٹری میں ایک شخص کا ڈی این اے معصوم بچی کے اجزا سے میچ ہو گیا جس کی لیبارٹری رپورٹ بھی جاری کردی گئی۔ سات سالہ مونیکا زیادتی و قتل کیس میں پولیس نے مجموعی طور پر 126 افراد کے اجزا لیبارٹری میں جمع کرائے تھے جن میں سے عبدللہ لاڑک نامی ملزم کا ڈی این اے میچ ہو گیا ہے۔ رواں ماہ کے اوائل میں پیر جو گوٹھ کے علاقے میں سفاک ملزم نے مونیکا لاڑک کو جنسی زیادتی کا نشانہ بنانے کے بعد موت کے گھاٹ اتار دیا تھا۔ بچی کا تعلق غریب گھرانے سے ہے اور وہ گھروں میں جھاڑو پوچھے کا کام کرتی تھی اور کام سے واپس آتے ہوئے اغوا ہوئی تھی۔ اس کی لاش کھیتوں سے ملی تھی۔

میرانشاہ: جدت ویب ڈیسک :شمالی وزیرستان میں زیر تعمیر پولیس چیک پوسٹ کو نامعلوم افراد نے بارودی مواد سے اڑا دیا۔ شمالی وزیرستان کی تحصیل میرانشاہ میں دتہ خیل روڈ پر گاں احمد خیل بابری اڈہ کے قریب زیر تعمیر پولیس چیک پوسٹ کو نامعلوم افراد نے بارودی مواد سے اڑا دیا۔ شر پسند رات کی تاریکی سے فائدہ اٹھاتے ہوئے فرار ہونے میں کامیاب ہوگئے۔مقامی حکام کا کہنا ہے کہ واقعے کے وقت چیک پوسٹ پر کوئی موجود نہیں تھا اس لئے کسی قسم کا جانی نقصان نہیں ہوا۔ پولیس نے شواہد اکٹھے کرکے تفتیش شروع کردی ہے۔