کلفٹن میں غیرملکی خاتون کی خودکشی کا معاملہ قتل نکلا

September 13, 2020 3:00 pm

کراچی: جدت ویب ڈیسک :کلفٹن میں غیرملکی خاتون کے قتل کو خودکشی کا رنگ دینے کی کوشش ناکام ہوگئی، بوٹ بیسن پولیس نے میڈیکل رپورٹ میں خاتون کو گلا دبا کر قتل کرنے کا انکشاف کردیا۔ رواں ماہ 4 ستمبر کو بوٹ بیسن کے علاقے کلفٹن بلاک 5 میں واقعے بنگلے سے قازقستان سے تعلق رکھنے والی 53 سالہ ڈیوڈ لانا زوجہ فاروق ڈوسا کی گلے میں پھندا لگی لاش ملی تھی جسے ابتدائی طور پر خودکشی کا معاملہ بتایا جا رہا تھا۔ پولیس نے وجہ موت کا تعین کرنے کے لیے پوسٹ مارٹم کرایا جس کی اب میڈیکل رپورٹ آگئی ہے۔ رپورٹ میں انکشاف ہوا ہے کہ ڈیوڈ لانا کو گلا دبا کر قتل کیا گیا۔ پولیس نے اس واقعے کے حوالے سے فاروق ڈوسا سے معلومات کیں تو وہ تسلی بخش جواب نہ دے سکے جبکہ وہ وہیل چیئر پر ہیں اور ان کی عمر 80 سال کے قریب ہے۔پولیس ذرائع کے مطابق پولیس جب بنگلے میں داخل ہوئی تو خاتون کی لاش پنکھے میں پھندے کی مدد سے لٹکی ہوئی تھی۔ انویسٹی گیشن پولیس کا کہنا ہے کہ واقعے کی تحقیقات کے لیے بنگلے کے ملازمین اور دیگر افراد کے بیانات قلم بند کیے جا رہے ہیں اور جلد ہی قاتل کا سراغ لگالیا جائے گا جب کہ قتل کے انکشاف کے بعد سرکار کی مدعیت میں دفعہ 302/34 کے تحت مقدمہ درج کرلیا گیا ہے۔

متعلقہ خبریں