ایکسپو سینٹر کراچی میں فیلڈ اسپتال کے قیام کا بڑا فیصلہ، شہر میں مزید 3 کیس رپورٹ سندھ میں کرونا وائرس کے کیسز کی تعداد 211 ہو گئی، صوبے میں تیسرا مریض بھی صحت یاب ہو گیا: وزیر اعلیٰ

March 19, 2020 12:51 pm

کراچی.ویب ڈیسک : ضلعی انتظامیہ نے کرونا وائرس کے ہنگامی صورت حال سے نمٹنے کے لیے ایکسپو سینٹر کراچی میں فیلڈ اسپتال قائم کرنے کا فیصلہ کر کے تیاریاں شروع کر دی ہیں، ادھر کراچی میں کرونا وائرس کے مزید 3 کیس رپورٹ ہوئے ہیں۔
کمشنر کراچی افتخار شالوانی نے وفاقی وزارت تجارت کے حکام سے رابطہ کر کے ایکسپو سینٹر کراچی میں فیلڈ اسپتال کے قیام کی تجویز دی، جسے وفاق نے قبول کر لیا۔
ذرایع کا کہنا ہے کہ وفاق کی جانب سے تجویز منظور ہونے کے بعد ایکسپو سینٹر میں کرونا کے مریضوں کے لیے فیلڈ اسپتال قائم کرنے کی تیاریاں شروع کر دی گئی ہیں، وزیر اعلیٰ سندھ مراد علی شاہ نے کمشنر کو فیلڈ اسپتال کے لیے بستر اور دیگر سامان خریدنے کی ہدایت بھی کر دی ہے۔
ادھر کراچی میں کرونا وائرس کے مزید 3 کیس رپورٹ ہو گئے ہیں، محکمہ صحت سندھ کا کہنا ہے کہ کراچی میں تینوں کیسز مقامی ہیں، ان کی کوئی ٹریول ہسٹری نہیں، سندھ میں کرونا وائرس کے کیسز کی تعداد 211 ہو گئی، حیدر آباد میں ایک، کراچی میں وائرس کے کیسز کی تعداد 59 ہے، تفتان سے آئے زائرین سکھر میں 151 کیسز مثبت ہیں۔
آج کرونا وائرس پر اجلاس میں وزیر اعلیٰ سندھ مراد علی شاہ نے کہا کہ وائرس میں مبتلا سندھ میں تیسرا مریض بھی صحت یاب ہو گیا ہے، جو اچھی علامت ہے۔ ہانگ کانگ، سنگاپور، تائیوان اور جنوبی کوریا نے اس انفیکشن کی رفتار پر کنٹرول کیا ہے، صرف کم سے کم سفر اور مسلسل اسکریننگ سے کرونا وائرس کو روکا جا سکتا ہے، بڑے اجتماع پر پابندی، سخت قرنطینہ کا عمل ہونا چاہیے۔
دوسری طرف، کراچی سے ماہر ڈاکٹروں کی ٹیم بھی سکھر کے قرنطینہ پہنچ چکی ہے۔ سکھر کی ضلعی انتظامیہ نے کہا ہے کہ تفتان سے مزید 757 زائرین کی قرنطینہ سینٹر آمد کے بعد تعداد 1060 ہو گئی ہے، اسکرنینگ کا عمل شروع کر دیا گیا ہے، بس کے ڈرائیورز اور کنڈیکٹرز کے سیمپلز اور بایو ڈیٹا لے لیا گیا ہے، مسافر کوچز کے ڈرائیورز، کنڈیکٹرز کی تعداد 60 ہے، زائرین کو رہایش کے ساتھ کھانے پینے کی اشیا دی گئی ہیں

متعلقہ خبریں