ایک نئی ایئر لائن آپریشن شروع کرنے کے لئے تیار،لائسنس جاری

January 1, 2020 7:36 pm

کراچی : جدت ویب ڈیسک ::پاکستانی فضاؤں میں پرواز کرنے کے لئے ایک نئی ایئر لائن نے آپریشن شروع کرنے کی تیاری کر لی ، سول ایوی ایشن اتھارٹی نے ایئر سیال کو ریگولر پبلک ٹرانسپورٹ کا لائسنس جاری کر دیا، ایئر سیال پہلے مرحلے میں ایک سال تک اندرون ملک کا فضائی آپریشن چلائے گی۔
تفصیلات کے مطابق پاکستان میں اندرون ملک ہوائی سفر کرنے والوں کے لئے نئے سال کی نئی خوشخبری سامنے آگئی، پاکستانی فضاؤں میں پرواز کرنے کے لئے ایک نئی ایئر لائن نے آپریشن شروع کرنے کی تیاریاں کرلیں۔
سول ایوی ایشن اتھارٹی نے ایئر سیال کو ریگولر پبلک ٹرانسپورٹ کا لائسنس جاری کر دیا ہے ، ایئر سیال سیالکوٹ چیمبر آف کامرس اور بزنس مین کمیوبٹی کے اشتراک سے لائی جا رہی ہے۔
پہلے مرحلے میں ایئر سیال کی جانب سے کراچی ،لاہور،اسلام آباد، سیالکوٹ،فیصل آباد اور پشاور کی سروسز شروع کی جائیں گی، ایئر بس اے 320 اور بوئنگ 787 طیارے آپریٹ کئے جائیں گے۔
ایئر سیال نے فضائی میزبانوں اور دیگر اسٹاف کی بھرتیوں کا آغاز کر دیا ہے ، سول ایوی ایشن اتھارٹی نے جناح انٹر نیشنل ایئر پورٹ پر ایئر سیال کے دفاتر قائم کر دیئے ہیں، جناح ایئر پورٹ پر ایئر سیال کا بکننگ آفس تیار کر دیا گیا، ایئر سیال پہلے مرحلے میں ایک سال تک اندرون ملک کا فضائی آپریشن چلائے گی ۔
ترجمان سی اے اے کا کہنا تھا کہ سی اے اے قوانین کے مطابق کوئی بھی نئی ایئر لائن کم از کم 3 طیاروں سے ایک سالہ مدت تک اندرون ملک پروازیں آپریٹ کرتی ہے ، ایک سالہ کامیاب مدت مکمل کرنے کے بعد بیرون ملک پروازوں کی اجازت دی جاتی ہے۔

متعلقہ خبریں