آج نواز شریف کا نام ای سی ایل سے نکال دیا جائے گا: گورنر پنجاب

November 11, 2019 1:54 pm

لاہور: جدت ویب ڈیسک ::گورنر پنجاب چوہدری محمد سرور نے کہا ہے کہ میاں نواز شریف کی صحت کے بارے میں سب فکر مند ہیں، آج ان کا نام ای سی ایل سے نکال دیا جائے گا۔ن لیگ کا ای سی ایل سے نام نکالنے میں تاخیر پر اظہار تشویش، جاتی امرا میں بیرون ملک سفر کی تیاریاں شروع۔۔۔۔
تفصیلات کے مطابق گورنر پنجاب نے آج ایگزٹ کنٹرول لسٹ سے سابق وزیر اعظم نواز شریف کا نام نکالے جانے کا عندیہ دے دیا ہے، ان کا کہنا تھا کہ آج کسی وقت نواز شریف کا نام ای سی ایل سے نکال دیا جائے گا، پھر وہ علاج کے لیے جہاں جانا چاہیں گے، جا سکیں گے۔
چوہدری سرور کا کہنا تھا ہم نے نواز شریف کی صحت کو سیاست میں نہیں لانا، ان کی صحت پر کوئی رسک نہیں لینا چاہتے۔
دوسری طرف ن لیگ نے نواز شریف کا نام ای سی ایل سے نکالنے میں تاخیر پر تشویش کا اظہار کیا ہے، ترجمان ن لیگ مریم اورنگ زیب نے کہا ہے کہ حکومت کا طبی بورڈ بھی کہہ چکا ہے کہ نواز شریف کو علاج کے لیے باہر بھجوایا جائے، اسپتال سے ڈسچارج کے وقت ڈاکٹرز نے بیرون ملک علاج کی تجویز دی، گزشتہ رات فل بورڈ نے بیرون ملک علاج کی سفارش کی۔
انھوں نے کہا ای سی ایل سے نام نکلے گا تو بیرون ملک جانے کے انتظامات ہوں گے، نام نکالنے میں تاخیر سے نواز شریف کی زندگی کو خطرات لا حق ہیں۔
ادھر جاتی امرا میں نواز شریف کے بیرون ملک سفر کی تیاریاں شروع کر دی گئی ہیں، ذرایع ن لیگ کا کہنا ہے کہ شریف خاندان نواز شریف کا نام ای سی ایل سے نکلنے کے لیے پرامید ہے، ہفتہ وار تعطیل کے باعث ان کا نام ای سی ایل سے نکلنے پر تاخیر ہوئی، نواز شریف کا کیس ہفتے کے دن عدالت میں لگنے پر ملک گیر تنقید بھی ہوئی، نیب نے تنقید سے بچنے کے لیے چھٹی کے روز نام ای سی ایل سے نکالنے سے احتراز کیا تھا۔ن لیگی ذرایع نے یہ بھی بتایا کہ نوا زشریف کو اسٹرائیڈز دینے کے باعث پلیٹ لیٹس فی الوقت نارمل ہیں، ڈاکٹرز فیصلہ کریں گے کہ نواز شریف کو معمول کی پرواز سے بھیجا جائے یا ایئر ایمبولینس سے۔

متعلقہ خبریں