. معصوم فرشتہ مہمند کے سفاکانہ قتل کی شدید مذمت کرتے ہیں، آئی ایس پی آر

May 23, 2019 11:10 am

راولپنڈی جدت ویب ڈیسک : : پاک فوج کے ترجمان نے معصوم فرشتہ کے قتل کی مذمت اور واردات میں ملوث ملزمان کی گرفتاری کیلئے ہر قسم کے تعاون کی پیشکش کرتے ہوئے کہا ہے کہ ہمیں مستقبل کی نسل کو بچانے کیلئے مل کر کوشش کرنا ہوگی۔
تفصیلات کے مطابق پاک فوج کے شعبہ تعلقات عامہ آئی ایس پی آر کے ڈائریکٹر جنرل میجر جنرل آصف غفور نے کہا ہے کہ اسلام آباد میں زیادتی کے بعد قتل ہونے والی معصوم بچی فرشتہ مہمند کے سفاکانہ قتل کی شدید مذمت کرتے ہیں۔واقعے کے ذمہ داروں کو انصاف کے کٹہرے میں لایا جائے، سماجی رابطے کی ویب سائٹ ٹوئٹر پر اپنے پیغام میں ان کا کہنا تھا کہ پاک فوج معصوم بچی کے قتل میں کسی بھی قسم کے تعاون کیلئے تیار ہے۔
ہمیں ننھی کلیوں کو مسلنے والے درندوں کیخلاف اٹھ کھڑا ہونا ہوگا اور ہمیں مستقبل کی نسل کو بچانے کیلئے مل کر کوشش کرنا ہوگی۔یاد رہے کہ اس اندوہناک واقعے کا وزیر اعظم عمران خان نے بھی سختی سے نوٹس لیا ہے ، انہوں نے آئی جی اسلام آباد، ڈی آئی جی آپریشنز سے وضاحت طلب کرلی ہے۔واضح رہے کہ ضلع مہمند سے تعلق رکھنے والی فرشتہ مہمند نامی دس سالہ بچی کو کچھ روز قبل اغوا کرکے مبینہ ذیادتی کے بعد سفاکانہ طریقے سے قتل کردیا گیا تھا۔واقعے کا مقدمہ والدین نے درج کروانے کی کوشش کی، والدین نے الزام عائد کیا ہے کہ پولیس نے غفلت کا مظاہرہ کیا اور ہماری بچی کو تلاش نہیں کیا۔

متعلقہ خبریں